Amit Shah News : लोकसभा निवडणुकीच्या सातव्या टप्प्याच्या प्रचारासाठी देशाचे गृहमंत्री अमित शाह हिमाचल प्रदेशातल्या ऊना येथे दाखल झाले होते. जाहीर सभेला संबोधित करताना अमित शाहांनी पाच टप्प्यांमध्ये झालेल्या निवडणुकीचा अंदाज बांधला.

अमित शाह म्हणाले की, पाच टप्प्यांमध्ये मोदीजी ३१० पार झाले आहेत. सहाव्या आणि सातव्या टप्प्यात ४०० पार करुन मोदीजींना पुन्हा पंतप्रधान बनवायचं आहे. सातव्या टप्प्यातील मतदारांवर ४०० पारची जबाबदारी आहे.

काँग्रेस नेते राहुल गांधी यांच्यावर निशाणा साधताना अमित शाह म्हणाले की, राहुल बाबा ४० जागांच्या खाली जात आहेत. हिमाचल प्रदेशमध्ये आमच्या तीन विधासभा उमेदवारांना विजयी करा म्हणजे इथेही भाजपचं सरकार स्थापन होईल.

राम मंदिराच्या मुद्द्यावरुन गृहमंत्री अमित शाह म्हणाले की, राहुल बाबा आणि त्यांची बहीण शिमल्यात सुट्टीसाठी येतात. परंतु आपल्या वोट बँकेच्या भीतीमुळे राम मंदिराच्या प्राणप्रतिष्ठेसाठी आले नाहीत. त्यांची वोट बँक रोहिंग्या घुसखोर आहेत. त्यांच्याच भीतीमुळे ते राम मंदिराच्या कार्यक्रमाला आले नाहीत.

अमित शाह पुढे म्हणाले, या निवडणुकीत एका बाजूला ६ महिने सुट्टी घालवणारे राहुबाबा आहेत तर दुसऱ्या बाजूला २३ वर्षांपासून दिपावलीची सुट्टी सेनेच्या जवानांसोबत घालवणारे मोदीजी आहेत. इंडी आघाडीकडे पंतप्रधान पदाचा उमेदवारदेखील नाहीये. एका पत्रकाराने पंतप्रधान पदाच्या उमेदवाराबाबत विचारलं असता त्यांनी प्रत्येक वर्षी नवीन पंतप्रधान बनेल, असं सांगितल्याचं अमित शाह म्हणाले.