नवी दिल्ली - लोकसभेतील विरोधी पक्षनेतेपदाची जबाबदारी काँग्रेस नेते राहुल गांधी स्वीकारणार की नाही याबाबत जोरदार तर्कवितर्क सुरू असताना काँग्रेसमधील सूत्रांकडून मिळालेल्या माहितीनुसार राहुल गांधी या पदासाठी तयार झाल्याचे समजते. संसद अधिवेशनादरम्यान लोकसभेमध्ये राहुल गांधींनी आज पहिल्या बाकावर विरोधी पक्षनेत्यांच्या स्थानावर बसून हे संकेत दिल्याचाही दावा काँग्रेस सूत्रांनी केला.

पंतप्रधान नरेंद्र मोदींच्या नेतृत्वाखाली ‘राष्ट्रीय लोकशाही आघाडी’ने तिसऱ्यांदा सरकार स्थापन केल्यानंतर विरोधकांच्या ‘इंडिया’ आघाडीने पहिल्या दिवसापासूनच सरकारविरुद्ध आक्रमक आघाडी उघडली असून काँग्रेस नेते राहुल गांधी या आघाडीचे नेतृत्व करत आहेत.

आता लोकसभेमध्ये विरोधी पक्षनेते पदावरून त्यांनी सरकारला घेरावे असा आग्रह काँग्रेसमधून आणि इंडिया आघाडीतील मित्रपक्षांकडून होत आहे. लोकसभा निवडणुकीच्या निकालानंतर दिल्लीत झालेल्या इंडिया आघाडीच्या बैठकीमध्येही हा मुद्दा चर्चेत आला होता.

काँग्रेसच्या सूत्रांनी दिलेल्या माहितीनुसार राहुल गांधी यांच्याकडे विरोधी पक्षनेतेपदाची जबाबदारी सोपविण्याची रणनीती आखण्यात आली आहे. विरोधी पक्षनेते झाल्यास राहुल यांना लोकसभेत बोलण्याची अधिक संधी मिळेल व पंतप्रधान नरेंद्र मोदींच्या बरोबरीने स्थान मिळेल, असा काँग्रेसचा होरा आहे.

सरकार आणि विरोधकांमधील चर्चेत थेट सहभागी होऊन राहुल गांधी पंतप्रधान मोदींना थेट लक्ष्य करतील. त्याचप्रमाणे सरकारमधील महत्त्वाच्या पदांवरील नियुक्त्यांमध्ये देखील विरोधी पक्षनेत्यांना असलेले कायदेशीर स्थान पाहता, या पदाचा राहुल गांधी पुरेपुर उपयोग करतील असाही दावा या सूत्रांनी केला.