नवी दिल्ली- काँग्रेस नेते राहुल गांधी आणि इतर विरोधी पक्ष नेत्यांनी पावसाळी अधिवेशन अचानक संपवल्याप्रकरणी संसदेच्या इमारतीसमोर आंदोलन केले. महिला खासदारांना मारहाण करण्यात आल्याचा आरोप विरोधकांनी केला आहे. विरोधकांना त्यांचे विचार संसदेत मांडण्याची संधी देण्यात आली नाही. काल महिला खासदारांसोबतची घटना लोकशाही विरोधी होती. पाकिस्तानच्या सीमेवर उभे टाकल्यासारखं आम्हाला वाटत होतं, असं म्हणत शिवसेना खासदार संजय राऊत यांनी सत्ताधाऱ्यांवर हल्लाबोल केला. (National Latest News)

राहुल गांधी यांनी माध्यमांशी बोलताना मोदी सरकारवर निशाणा साधला. विरोधकांना संसदेत बोलू देण्यात आलं नाही. म्हणून आम्ही माध्यमांसमोर बोलण्यासाठी आलो आहोत. लोकशाहीची हत्या झाली आहे. संसदेचे अधिवेशन संपले आहे. देशातील 60 टक्के लोकांचा आवाज दाबण्यात आला. यांच्यासाठी हे अधिवेशन नव्हते. राज्यसभेत मारहाण करण्यात आली. ही लोकशाहीची हत्या आहे, अशी टीका राहुल गांधी यांनी केली. केंद्र सरकारने कृषी कायदे रद्द करावेत यासाठी विरोधकांनी संसदेपासून विजय चौकापर्यंत मार्च काढला.

राष्ट्रवादी काँग्रेसचे प्रमुख शरद पवार यांनीही संसदेतील घटनेवरुन मोदी सरकारवर टीका केली. गेल्या 55 वर्षांच्या कार्यकाळात कधीही महिला खासदारांवर हल्ला झाल्याचं पाहिलं नाही. हे खुप दु:खद आहे. हा लोकशाहीवरील हल्ला आहे, असं शरद पवार म्हणाले. जवळपास 40 मार्शल (महिला आणि पुरुष) आणि सुरक्षा दल हल्ल्यासाठी तैनात करण्यात आले होते. काँग्रेसनेही या मुद्द्यावरुन सरकारवर हल्लाबोल केला. संसदेत जे घडलं ते अॅट्रोसिटीपेक्षाही भयंकर होतं, असं काँग्रेस नेते जयराम रमेश म्हणाले.

विरोधकांच्या गोंधळामुळे राज्यसभा आणि लोकसभा दोन दिवस आधी स्थगित करण्याचा निर्णय घेण्यात आला. जवळपास 15 पक्षांनी एकत्र येऊन सत्ताधाऱ्यांविरोधात मोर्चा उघडला होता. शेतकऱ्यांचे आंदोलन, पेगॅसस प्रकरण आणि वाढते इंधर दर यावरुन सत्ताधाऱ्यांना घेरण्यात आले. या सर्व मुद्द्यांमुळे संसदेचे कामकाज गोंधळात पार पडले. 2024 मध्ये लोकसभा निवडणुकीआधी काँग्रेसच्या नेतृत्वाखाली आघाडी निर्माण करण्याचे प्रयत्न सुरु आहेत.