नवी दिल्ली : कोरोना विरोधात कोविशील्डचा डोस घेतलेल्या नागरिकांसाठी महत्त्वाची बातमी असून पहिल्या डोसनंतर दुसऱ्या डोससाठी आता चार महिने वाट पाहावी लागणार नाहीये. कारण नॅशनल टेक्निकल अॅडव्हायझरी ग्रुप ऑन इम्युनायझेशनने (NTAGI), कोविशील्ड लसीकरणाच्या पहिल्या आणि दुसऱ्या डोसमधील अंतर कमी करण्याची शिफारस केंद्राला केली आहे. शिफारसीनुसार कोविशील्डचा दुसरा डोस 8 ते 16 आठवड्यांच्या दरम्यान देण्याचा सल्ला देण्यात आला आहे. देशातील कोरोना रुग्णांची घटती संख्या आणि लसीकरणाच्या वाढत्या संख्येच्या पार्श्वभूमीवर ही शिफारस करण्यात आली आहे. याबाबत एनडीटिव्हीने वृत्त प्रकाशित केले आहे.

सध्या, NTAGI ने कोविशील्डच्या दोन डोसमधील अंतर कमी करण्याच्या प्रस्ताव प्रत्यक्षात अंमलात येणे बाकी असून, सल्लागार गटाचा प्रस्ताव जागतिक स्तरावर करण्यात आलेल्या अलीकडील काही वैज्ञानिक अभ्यासांच्या आधारे तयार करण्यात आला आहे. दरम्यान, सरकारने या प्रस्तावाला मान्यता दिल्यास लाभार्थ्यांना कोविशील्डचा दुसरा डोस जलद मिळण्याचा मार्ग मोकळा होईल, असे सांगण्यात आले आहे.

सध्या देशात 60 ते 70 दशलक्ष लोक असे आहेत ज्यांना या लसीचा दुसरा डोस मिळालेला नाही. यापूर्वी 13 मे 2021 रोजी केंद्र सरकारने कोविशील्डच्या पहिल्या आणि दुसऱ्या डोसमधील अंतर 6 ते 8 आठवड्यांवरून 12 ते 16 आठवड्यांपर्यंत वाढवले ​होते. याबाबतही NTAGI ने आरोग्य मंत्रालयाला प्रस्ताव दिला होता. सध्या लसीकरण धोरणांतर्गत, कोविडशील्डच्या पहिल्या डोसनंतर 12 ते 16 आठवड्यांनंतर दुसरा डोस दिला जात असून, NTAGI ने भारत बायोटेकच्या कोवॅक्सिनच्या दोन डोसमधील 28 दिवसांच्या कालावधीत बदल केलेला नाही.