संयुक्त राष्ट्राच्या आमसभेच्या ७६ वे सत्र १४ सप्टेंबरपासून सुरु झाले आहे. यामध्ये पंतप्रधान नरेंद्र मोदी २५ सप्टेंबरला संबोधन करणार आहे. त्यानिमित्त पंतप्रधान मोदी अमेरिका दौऱ्यावर जाणार आहेत. मंगळवारी ते अमेरिका दौऱ्यासाठी रवाना होतील. यात संयुक्त राष्ट्राच्या आमसभेला संबोधनासह जगातील नेत्यांची भेटही मोदी घेणार आहेत. संयुक्त राष्ट्राच्या आमसभेसाठी जगातील जवळपास १०० देशांचे प्रमुख अमेरिकेत उपस्थित असणार आहेत.

पंतप्रधान नरेंद्र मोदी हे संयुक्त राष्ट्राच्या आमसभेत सहभागी होण्याआधी अमेरिकेचे राष्ट्राध्यक्ष ज्यो बायडेन यांची २४ सप्टेंबरला भेट घेणार आहेत. बायडेन राष्ट्राध्यक्ष झाल्यानंतर पंतप्रधान मोदींचा हा पहिलाच अमेरिका दौरा आहे. बायडेन यांची याच दिवशी जपानचे पंतप्रधान सुगा योशीहिदे यांच्यासोबत भेट होणार आहे. तसंच ऑस्ट्रेलियाचे पंतप्रधान स्कॉट मॉरिसन यांचीही भेट बायडेन घेणार आहेत.

ज्यो बायडेन हे संयुक्त राष्ट्राच्या आमसभेत मंगळवारी संबोधित करणार आहेत. त्यावेळी न्यूयॉर्कमध्येच बायडेन मॉरिसन यांची भेट घेतील. त्यानतंर ब्रिटनचे पंतप्रधान बोरिस जॉन्स यांची मंगळवारी बायडेन यांच्यासोबत बैठक आहे. पंतप्रधान मोदी अमेरिकेत २४ सप्टेंबर रोजी बायडेन यांची भेट घेण्याआधी २३ सप्टेंबरला उपराष्ट्राध्यक्षा कमला हॅरिस यांची भेट घेणार आहेत.