भारताच्या दौऱ्यावर असलेले जपानचे पंतप्रधान फुमियो किशिदा यांना पंतप्रधान मोदींनी 'कृष्ण पंखा' गिफ्ट केला आहे. राजस्थानमध्ये बनवलेल्या चंदनाच्या पंख्यात राधा-कृष्णाची प्रतिमा साकारण्यात आली आहे. ही कलाकृती चंदनाच्या लाकडात तयार करण्यात आल्याचे तिचं मूल्य वाढतं. यामध्ये तयार करण्यात आलेल्या खिडक्यांवर भगवान कृष्णाच्या वेगवेगळ्या मुद्रा आहेत.

प्रेम, करुणेचे हे प्रतिक मानलं जातं. जपान आणि भारतामध्ये यंदा ४ हजार २०० कोटींचे विविध व्यवहार झाले आहेत. या करारांच्या संमतीसाठी किशीदा भारताच्या दौऱ्यावर आहेत. शनिवारी त्यांचं दिल्लीत आगमन झालं.

या गिफ्टचा तपशील देताना संबंधित 'पंखा' पारंपारिक साधनांचा वापर करून तयार केल्याचं सूत्रांनी सांगितलं. वरच्या बाजूला हाताने कोरलेली मोराची आकृती देखील आहे. भारताच्या राष्ट्रीच पक्ष्याचा समावेश या पंख्यात करण्यात आलाय. मोराची सुबक आकृती मृदू आणि सुंदरतेचं प्रतिक आहे. त्याच्या काठावर एक लहान घुंगरू बसवण्यात आलं आहे. पंखा वापरताना त्याचा आवाज होतो. पंख्यावर रेखीव कोरीवकाम केलेल्या चार खिडक्या तयार करण्यात आल्या आहेत.

चंदनाच्या लाकडावर कोरलेल्या या पंख्याचं काम राजस्थानमधील चुरू या ठिकाणच्या कारागीरांनी साकारलंय. यामुळे चंदनाच्या लाकडाची कलाकृती सुंदर आणि मोहक वाटते. ही कलाकृती शुद्ध चंदनापासून बनलेली आहे. हे चंदन प्रामुख्याने भारताच्या दक्षिणेकडील राज्यांमध्ये सापडतं. पारंपारिक जाळीच्या डिझाइनला भारतीय कलेत वेगळं स्थान आहे. राजस्थानातील अनेक राजपूत घरातील भांड्यावर आणि लाकडी पंख्यांवर अशा पद्धतीची कलाकृती तयार करण्यात आली होती. चंदन हे त्याच्या विशिष्ट सुगंधासाठी ओळखलं जातं.