चंदीगढ : पंजाबमध्ये सध्या वीजेचं संकट तीव्र झालं आहे. आता यासंदर्भात राजकारण देखील तापलेलं आहे. शुक्रवारी शिरोमणी अकाली दल आणि बसपा युतीने आंदोलन केलं होतं. तर आज शनिवारी आम आदमी पार्टीने सिसवानमध्ये मुख्यमंत्री अमरिंदर सिंह यांच्या फार्महाऊसला घेराव घालून आंदोलन केलं आहे. पोलिसांनी या आंदोलकांना रोखण्यासाठी बॅरिकेडींग केलं होतं. मात्र, कार्यकर्त्यांनी हे बॅरिकेड्स देखील तोडले आहेत.

यानंतर पोलिसांनी आंदोलकांवर पाण्याच्या तीव्र फवाऱ्याचा मारा केला. यावेळी आम आदमी पक्षाचे पंजाबचे प्रदेशाध्यक्ष आणि खासदार भगवंत मान यांनी म्हटलंय की, पंजाबमध्ये लोक धरणे आंदोलन करत आहेत आणि केवळ एक व्यक्ती आपल्या घरी बसून आनंद घेत आहे. आम्ही मुख्यमंत्र्यांच्या फार्म हाऊसचा मीटर चेक करण्यासाठी आलो आहेत जेणेकरुन हे समजेल की इथे किती तास वीज कापली जात आहे. गेल्या अनेक दिवसांपासून सातत्याने वीज मोठ्या कालावधीसाठी जात आहे. यामुळे लोकांना मोठा त्रास सोसावा लागत आहे.