पंजाबमध्ये अमरिंदर सिंग यांच्या राजीनाम्यानंतर चरणजीत सिंग चन्नी यांनी मुख्यमंत्रीपदाची शपथ घेतली. चरणजीत हे पंजाबचे १६ वे मुख्यमंत्री ठरले आहेत. तर पहिल्यांदाच राज्याला दलित समुदायातील मुख्यमंत्री मिळाला आहे. पुढच्या वर्षी विधानसभा निवडणुका होणार असून त्याआधीच राज्यात मुख्यमंत्री बदलण्यात आला आहे. काँग्रेसमधील अंतर्गत कलहामुळे अमरिंदर सिंग यांनी राजीनामा शनिवारी राजीनामा दिला.

चरणजीस सिंग चन्नी यांच्यासोबत सोमवारी सुखजिंदर सिंह रंधावा यांनीही शपथ घेतली सुखजिंदर यांच्यासोबत ओपी सोनी यांनाही मंत्रिपदाची शपथ देण्यात आली. दरम्यान, चन्नी यांचा शपथविधी ११ वाजता होणार होता मात्र तो साडेअकरा वाजेपर्यंत पुढे ढकलला होता. काँग्रेसचे माजी अध्यक्ष राहुल गांधी या शपथविधीला उपस्थित होते.

काँग्रेसनं दलित चेहरा मुख्यमंत्री म्हणून दिला आहे. याआधी भाजपने घोषणा केली होती की त्यांची सत्ता आल्यास राज्यात दलित व्यक्तीकडे नेतृत्व सोपवलं जाईल. बसपासोबत युती करणाऱ्या शिरोमणि अकाली दलानेसुद्धा अशीच भूमिका जाहीर केली होती. त्यामुळे व्होट बँकेचा विचार करूनच काँग्रेसनं चन्नी यांच्याकडे मुख्यमंत्रिपद सोपवल्याची चर्चा आहे.

चरणजीत सिंग हे दलित शिख समाजातील आहेत. अमरिंदर सिंग यांच्या सरकारमध्ये ते तंत्रशिक्षण मंत्री होते. रुपनगर जिल्ह्यातील चमकौर साहिब विधानसभा मतदारसंघातून ते आमदार आहेत. २००७ मध्ये ते पहिल्यांदा आमदार झाले होते. तेव्हापासून आतापर्यंत त्यांनी आमदारकी जिंकली आहे.