Ram Mandir Ayodhya: माजी केंद्रीय मंत्री, मध्य प्रदेशचे माजी मुख्यमंत्री भाजप नेत्या उमा भारती यांनी 22 जानेवारीला अयोध्येत अभिषेक सोहळ्यात विरोधी पक्षनेते, उद्योगपती आणि सेलिब्रिटींच्या सहभागाच्या मुद्द्यावर भाष्य केले आहे. उमा भारती यांनी वयाच्या 12 व्या वर्षी राम मंदिर आंदोलनात सहभाग घेतला होता. अयोध्या म्हणजे रामभक्तीवर आमची मक्तेदारी नाही पण प्रभू राम सर्वांचा, असे उमा भारती यांनी स्पष्ट सांगितले.

उमा भारती यांनी इंडियन एक्स्प्रेसला मुलाखत दिली. "प्राण प्रतिष्ठेला उपस्थित राहण्याचे आमंत्रण हा राम मंदिरतीर्थ क्षेत्र ट्रस्टचा निर्णय आहे. हा राजकीय कॉल नाही. रामभक्तीवर आमचा कोणताही कॉपीराइट नाही. भगवान राम आणि हनुमान जी भाजपचे नेते नसून ते आपला राष्ट्रीय अभिमान आहेत. कोणीही त्यांच्या मंदिराच्या अभिषेकात सहभागी होऊ शकतो आणि कोणालाही त्यासाठी आमंत्रित केले जाऊ शकते."

राम मंदिर उद्घाटन सोहळ्याकडे राजकीय दृष्टीकोणातून पाहू नका. तुमच्या घरांमध्येही रामाची छायाचित्रे आहेत. त्यामुळे तुम्ही त्यात सहभागी व्हा. तुम्हाला मतं मिळणार नाहीत याची भीती बाळगू नका. मी भाजपच्या लोकांनाही सांगेन की, या अहंकारातून बाहेर पडा, फक्त तुम्हीच रामाची पूजा करू शकता. अहंकार किंवा भीतीपासून मुक्त राहून आपण सर्वांनी रामललाच्या अभिषेकात आनंदाने सहभागी झाले पाहिजे, असे उमा भारती म्हणाल्या, यावेळी त्यांनी विरोधकांना देखील सल्ला दिला. (Latest Marathi News)

6 डिसेंबर 1992 रोजी बाबरी मशिदीची इमारत पाडली जात असताना उमा भारती तिथे उपस्थित होत्या. बाबरी विध्वंसासाठी आरोपी असलेल्या 32 जणांमध्ये त्या होत्या. दरम्यान 2020 मध्ये या सर्वांना सीबीआयच्या विशेष न्यायालयाने निर्दोष मुक्त केले. गेल्या वर्षी अलाहाबाद उच्च न्यायालयानेही त्यांच्या निर्दोष सुटकेविरुद्ध केलेले अपील फेटाळले होते.