Farooq Abdullah: ‘काश्मीरच्या मुद्द्यावर तोडगा काढण्यासाठी भारताने पाकिस्तानसोबत चर्चा करायला हवी,’ असे मत ‘नॅशनल कॉन्फरन्स’चे नेते फारुख अब्दुल्ला यांनी आज मांडले. ‘आपण या मुद्यावर चर्चा सुरू केली नाही तर आपली अवस्था देखील गाझासारखी होईल,’ असेही त्यांनी नमूद केले.

यावेळी अब्दुल्ला यांनी दिवंगत माजी पंतप्रधान अटलबिहारी वाजपेयी यांच्या विधानाचा दाखला दिला. ‘आपण आपले मित्र बदलू शकतो पण शेजारी नाही,’ असे विधान वाजपेयी यांनी केले होते.

फारुख अब्दुल्ला म्हणाले, ‘‘ खुद्द पंतप्रधान नरेंद्र मोदी यांनीच आता युद्ध हा पर्याय असू शकत नाही असे म्हटले आहे. काश्मीरच्या मुद्द्यावर चर्चेच्या माध्यमातून तोडगा काढायला हवा. पण आता चर्चा होते तरी कोठे? नवाझ शरीफ हे पाकिस्तानचे पंतप्रधान होण्याची शक्यता असून आता तेच स्वतः भारतासोबत चर्चा करायला आम्ही तयार आहोत, असे सांगत आहेत पण आपण चर्चा करायला पुढाकार का घेत नाही? नेमके काय कारण आहे? आम्हाला या समस्येवर संवादाच्या माध्यमातून तोडगा काढता आला नाही तर जी अवस्था आज गाझा आणि पॅलेस्टाईनमध्ये आहे तीच येथेही निर्माण होईल.’’

त्या घटनेची चौकशी करावी-

‘‘ केवळ लष्कराच्या अधिकाऱ्यांची बदली करून निर्दोष नागरिकांच्या संशयास्पद मृत्यूचे प्रकरण मार्गी लागणार नाही. चौकशीदरम्यान निष्पाप लोकांचा छळ करून कशासाठी मारले जाते? याची चौकशी होणे गरजेचे असल्याचेही त्यांनी सांगितले. लष्कराच्या अधिकाऱ्यांनी चौकशीसाठी म्हणून काही नागरिकांना ताब्यात घेतले होते त्यांच्या जखमांवर तिखट चोळण्यात आले. यातील तिघाजणांना छळ सहन झाला नाही आणि त्यांनी प्राण सोडले. यातील पाचजण हे सध्या रुग्णालयात आहेत. ज्या संशयिताचा मृत्यू झाला त्याचा एक भाऊ सीमा सुरक्षा दलामध्ये काम करतो आहे,’’ असे फारुख अब्दुल्ला यांनी स्पष्ट केले.

फारुख अब्दुल्ला यांचे विधान चुकीचे असून त्यांच्यासारखा ज्येष्ठ नेता पाकिस्तानसोबत चर्चेची मागणी करतो हीच बाब चुकीची आहे. केंद्रातील हे सरकार पाकिस्तानसमोर गुडघे टेकणार नाही, ही बाब त्यांनी लक्षात घ्यावी. आम्ही प्रयत्न देखील केला होता पण ते वारंवार पाठीमध्ये वार करत आहेत.

- हिना शफी भट, भाजपच्या ज्येष्ठ नेत्या