जम्मू-काश्मीर: श्रीनगरमध्ये (Shrinagar) एका पोलिस बसवर दहशतवादी हल्ला झाला आहे. या हल्ल्यामध्ये तीन जणांचा मृत्यू झाला आहे तर चौदा जण जखमी झाले आहेत. तीन जवानांची प्रकृती अत्यंत गंभीर आहे. हा दहशतवादी हल्ला जम्मू-काश्मीरमधील झेवान भागात झाला असल्याची माहिती सूत्रांनी दिली आहे. (Terrorists attack)

मिळालेल्या माहितीनुसार, काश्मीर टायगर्स या संघटनेनं ही जबाबदारी घेतली असून पहिल्यांदाच हे नाव समोर आलं आहे. हा ग्रुप लष्कर-ए-तय्यबाशी निगडीत असावा, अशीही माहिती समोर आली आहे. या हल्ल्यामध्ये किती अतिरेकी होते आणि कसा हल्ला करण्यात आला, याबाबत तपास सुरु आहे. सध्या सर्व जखमींना दवाखान्यात नेण्यात आलं आहे. परिसराची नाकेबंदी करण्यात आली आहे.

काश्मिरात दोन दहशतवाद्यांना कंठस्नान

दुसरीकडे, आज काश्मिरमधील रंगरेठमध्ये सुरक्षा दलांबरोबर झालेल्या चकमकीत दोन दहशतवादी ठार झाले. या परिसरात दहशतवादी असल्याची माहिती सुरक्षा दलांना मिळाली होती. त्यानंतर, सुरक्षा दले आणि पोलिसांच्या संयुक्त पथकाने परिसराला वेढा घातला. शोधमोहीम सुरू केली.

यावेळी दहशतवादी व सुरक्षा दलांत चकमक झाली. या ठिकाणी लपून बसलेल्या दहशतवाद्यांनी दलावर बेछूट गोळीबार केला. सुरक्षा दलांनी प्रत्युत्तरादाखल केलेल्या गोळीबारात दोन अज्ञात दहशतवाद्यांचा मृत्यू झाला. यापूर्वी, रविवारी दक्षिण काश्मिरातील पुलवामा जिल्ह्यात सुरक्षा दलांनी जैशे मोहम्मदच्या एका दहशतवाद्याला कंठस्नान घातले होते.