नवी दिल्ली : उत्तर प्रदेश सरकारने CAA विरोधी आंदोलकांना पाठवलेल्या वसुलीच्या नोटिसा मागे घेण्याचा निर्णय घेतला आहे. सार्वजनिक मालमत्तेच्या झालेल्या नुकसानीबाबत राज्य सरकारने ही कारवाई करत प्रशासनाने 274 जणांना वसुलीच्या नोटिसा पाठवल्या होत्या. याप्रकरणी सर्वोच्च न्यायालयाने (Supreme Court) उत्तर प्रदेश सरकारला फटकारले होते. (UP Govt Drops Recovery Notices To Anti CAA Protesters)

राज्य सरकारने 14 आणि 15 जानेवारी रोजी सर्व 274 नोटिसा मागे घेण्याचे आदेश जारी केले आहेत, अशी माहिती उत्तर प्रदेश सरकारचे वकील गरिमा प्रसाद यांनी सांगितले आहे. 2019 मध्ये 274 जणांविरोधात पाठविण्यात आलेल्या जारी केलेल्या नोटिसा मागे घेतल्याचे यूपी सरकारने सर्वोच्च न्यायालयाला कळवले आहे. तसेच त्यांच्यावरील कारवाई देखील मागे घेण्यात आल्याचे म्हटले आहे.