उत्तर प्रदेशात वेगवेगळ्या तुरुंगामध्ये असलेल्या तीन नेत्यांच्या अडचणीत आणखी वाढ झाली आहे. सपा नेते आजम खान, गँगस्टर ते आमदार असा प्रवास केलेले मुख्तार अन्सारी आणि अतिक अहमद यांच्याविरोधात चौकशीसाठी ईडीला परवानगी मिळाली आहे. आता ईडी या तिघांची मनी लाँड्रिंग प्रकरणी चौकशी करणार आहे.

सक्तवसुली संचालनालयाने तीन नेत्यांविरोधात मनी लाँड्रिंगचा गुन्हा दाखल केला होता. ईडीने न्यायालयात या तिन्ही नेत्यांना ताब्यात देण्याची मागणी केली होती. न्यायालयाने ईडीची मागणी मान्य केली असून लवकरच ईडी या तिघांची चौकशी करेल.

समाजवादी पक्षाचे नेत आझम खान यांच्यावर शेतकऱ्यांची जमिन हडपल्याचा आरोप आहे. त्याची तक्रार शेतकऱ्यांनी राज्यपालांकडे केली होती. जौहर युनिव्हर्सिटीच्या नावाखाली जमिन घेताना त्यांनी सरकारी पैशांचा वापर केला. दुसरीकडे युपीतील बांदा तुरुंगात असलेले आमदार मुख्तार अन्सारी यांच्याविरोधात ईडीने मनी लाँड्रिंगचा गुन्हा दाखल केला होता. त्यांनी अवैधरित्या सरकारी जमिनीवर अतिक्रमण केल्याचा आरोप आहे. तर अतिक अहमद यांच्यावरही बेनामी संपत्ती जमवल्याचा आरोप आहे.