नवी दिल्ली : भाजपचे ज्येष्ठ नेते लाल कृष्ण अडवाणी यांची प्रकृती अचानक बिघडल्यानं त्यांना दिल्लीच्या खासगी रुग्णालयात दाखल करण्यात आलं आहे. त्यांची प्रकृती सध्या स्थिर असून डॉक्टरांच्या निगराणीखाली त्यांच्यावर उपचार सुरु आहेत. (Veteran BJP leader Lal Krishna Advani admitted to Apollo Hospital due to bad health condition)

एएनआयच्या माहितीनुसार, अडवाणी यांना अचानक अस्वस्थ वाटू लागल्यानं रात्री ९ वाजण्याच्या सुमारास दिल्लीच्या अपोलो रुग्णालयात दाखल करण्यात आलं. डॉ. विनीत सुरी यांच्या मार्गदर्शनाखाली त्यांच्यावर उपचार सुरु आहेत. पण त्यांना नेमका काय त्रास होत आहे हे अद्याप कळू शकलेलं नाही.

दरम्यान, गेल्याच आठवड्यात अडवाणी यांच्यावर एम्स रुग्णालयात उपचार सुरु होते त्यानंतर प्रकृती स्थिर झाल्यानंतर दुसऱ्याच दिवशी त्यांना रुग्णालयातून डिस्चार्ज देण्यात आला होता. वयानुसार सुरु झालेल्या प्रकृती अस्वास्थ्यामुळं त्यांना रुग्णालयात दाखल करण्यात आल्याचं सांगण्यात आलं होतं. लालकृष्ण अडवाणी यांचं वय ९६ वर्षे आहे.