नवी दिल्ली : काँग्रेस राज्यात आल्यास शासकीय इमारती आणि परिसरात लागणाऱ्या राष्ट्रीय स्वयंसेवक संघाच्या (आरएसएस) शाखांवर बंदी घालू, असे आश्वासन पक्षाने आपल्या जाहीरनाम्याच्या माध्यमातून दिले. काँग्रेसच्या जाहीरनाम्यातील या आश्वासनानंतर सत्ताधारी भाजपकडून संताप व्यक्त केला जात आहे. 

मध्यप्रदेश विधानसभा निवडणुकीच्या पार्श्वभूमीवर सत्ताधारी भाजप-काँग्रेसकडून आरोप-प्रत्यारोप केले जात आहेत. त्यानंतर काँग्रेसकडून जाहीरनामा नुकताच प्रसिद्ध करण्यात आला. या जाहीरनाम्यात काँग्रेसने आरएसएसच्या शाखांवर बंदी घालू असे आश्वासन दिले. जाहीरनाम्यातील काँग्रेसच्या या आश्वासनानंतर भाजप संतप्त झाला आहे. तसेच काँग्रेसने या जाहीरनाम्यामध्ये आरएसएसच्या शाखांवर बंदी घालण्यासोबतच सरकारी कर्मचाऱ्यांना शाखेमध्ये भाग घेण्याबाबतचा आदेशही रद्द करण्यात येईल, असेही म्हटले आहे.

दरम्यान, ''सध्या काँग्रेसचा एकच उद्देश आहे, तो म्हणजे 'मंदिर बनू देणार नाही आणि शाखा चालू देणार देणार नाही'', अशा शब्दांत भाजपचे प्रवक्ते संबित पात्रा यांनी काँग्रेसवर निशाणा साधला.