नवी दिल्ली - दिल्लीतील डाबरी परिसरात महिलेची एका व्यक्तीने तिच्या घराबाहेरच गोळ्या घालून हत्या केल्याची धक्कादायक घटना समोर आली आहे. आरोपीला पकडण्यासाठी पोलिस घटनास्थळी दाखल होताच, आरोपीने आपल्या घरात स्वत:वर गोळी झाडून आत्महत्या केली.

माहिती मिळताच डाबरी पोलिसांनी घटनास्थळी धाव घेत मृतदेह ताब्यात घेऊन शवविच्छेदनासाठी पाठविला. मृत रेणू गोयल आपल्या कुटुंबासह डाबरी येथे राहत होत्या. त्यांच्या पश्चात पती डीपी गोयल आणि दोन मुले असा परिवार आहे.

डीपी गोयल व्यावसायाने प्रॉपर्टी डीलर आहे. गुरुवार रात्री सुमारे सव्वा आठच्या दरम्यान रेनू गोयल घराबाहेर उभ्या होत्या. त्याचवेळी एक व्यक्ती तिथे आला. तो रेनू यांच्यासमोर थांबला अन् काही समजण्याआधीच त्याने गोळीबार सुरू केला. यावेळी आरोपीने रेणू यांच्यावर दोन गोळ्या झाडल्या.

गोळीबाराचा आवाज ऐकून कुटुंबीय बाहेर आले असता त्यांना रेणू रस्त्यावर पडलेल्या दिसल्या.कुटुंबीयांनी त्यांना तात्काळ रुग्णालयात दाखल करून पोलिसांना कळवले. पोलीस येईपर्यंत रेणू यांचा मृत्यू झाला. आरोपीचे नाव आशिष (२३) असून तो मृत महिलेचा शेजारी असल्याचे निष्पन्न झाले.

त्यानंतर पोलीस घरी पोहोचण्यापूर्वीच आरोपी आशिषने घरात गोळी झाडून आत्महत्या केली. पोलिसांनी दिलेल्या माहितीनुसार, हे दोघे एकमेकांना अनेक वर्षांपासून ओळखत होते आणि एकत्र जिम करायचे.