नाशिक : देशभरातील विविध बारा केंद्रीय विद्यापीठांमध्ये प्रवेशासाठी प्रवेश परीक्षा घेतली जाणार आहे. यासंदर्भात नॅशनल टेस्टिंग एजन्‍सीने महत्त्वाच्‍या तारखांची घोषणा केली आहे. त्‍यानुसार सेंट्रल युनिव्हर्सिटीज कॉमन एन्ट्रन्स टेस्‍ट (CU-CET) २०२१ परीक्षा अर्जासाठी १ सप्‍टेंबरपर्यंत अर्ज करता येणार आहे.

१५, १६ आणि २३, २४ सप्‍टेंबरदरम्‍यान ही परीक्षा देशभरात घेतली जाईल. दोन तासांची ही परीक्षा कॉम्‍प्‍युटर बेस्‍ड टेस्‍ट असेल. भाषाविषयक शिक्षणक्रम वगळता अन्‍य सर्व शिक्षणक्रमांच्‍या प्रवेशासाठी केवळ इंग्रजी माध्यमातून प्रश्‍न विचारले जातील. तसेच, वस्‍तुनिष्ठ बहुपर्यायी स्वरूपाच्या प्रश्‍नांचा परीक्षेत समावेश असणार आहे.

या विद्यापीठांचा समावेश

आसाम विद्यापीठ (सिलचर) यासह आंध्र प्रदेश, गुजराथ, हरियाना, जम्‍मू, झारखंड, कर्नाटक, केरळ, पंजाब, राजस्‍थान, तमिळनाडू येथील केंद्रीय विद्यापीठ आणि दक्षिण बिहार केंद्रीय विद्यापीठ अशा बारा विद्यापीठांमध्ये या प्रवेश परीक्षेतून प्रवेश निश्‍चित करता येणार आहे.