पुणे : दहावीनंतरच्या प्रथम वर्ष अभियांत्रिकी पदविका (engineering diploma admissions), तसेच बारावीनंतरच्या औषधनिर्माणशास्त्र, हॉटेल मॅनेजमेंट ॲण्ड केटरिंग टेक्नॉलॉजी, सरफेस कोटिंग टेक्नॉलॉजी प्रथम वर्ष पदविका अभ्यासक्रमाला प्रवेश घेण्यासाठी राबविण्यात येणाऱ्या ऑनलाइन प्रवेश प्रक्रियेला पुन्हा एकदा मुदतवाढ मिळाली आहे. त्यानुसार विद्यार्थ्यांना ऑनलाइन अर्ज करण्यासाठी तीन सप्टेंबरपर्यंत मुदत देण्यात आली आहे.

शैक्षणिक वर्ष २०२१-२२ करिता पूर्णवेळ पोस्ट दहावी एसएससी आणि पोस्ट एचएससी या पदविका अभ्यासक्रमाच्या प्रवेशासाठी तंत्रशिक्षण संचालनालयाकडून ही ऑनलाइन प्रवेश प्रक्रिया राबविण्यात येत आहे. अभियांत्रिकी पदविका अभ्यासक्रमासाठी राज्यात एकूण एक लाख तीन हजार जागा उपलब्ध आहेत. त्यासाठी आतापर्यंत ७८ हजार विद्यार्थ्यांनी अर्ज ऑनलाइन पद्धतीने निश्चित केला आहे. याबाबतचे परिपत्रक तंत्रशिक्षण संचालनालयाने

‘http://www.dtemaharashtra.gov.in’ या संकेतस्थळावर प्रसिद्ध केले आहे.

प्रवेशाचे सुधारित वेळापत्रक

दहावीनंतर

• प्रवेशासाठी ऑनलाइन नोंदणी करणे, कागदपत्रांच्या स्कॅन छायाप्रती अपलोड करणे, कागदपत्रांची पडताळणी आणि अर्ज भरल्याची निश्चिती करणे : ३ सप्टेंबरपर्यंत

• तात्पुरत्या गुणवत्ता याद्या प्रदर्शित करणे : ५ सप्टेंबर

• तात्पुरत्या गुणवत्ता याद्यांमध्ये तक्रारी असल्यास सादर करणे : ६ ते ८ सप्टेंबर

• अंतिम गुणवत्ता याद्या प्रदर्शित करणे : ९ सप्टेंबर

बारावीनंतर

• प्रवेशासाठी ऑनलाइन नोंदणी करणे, कागदपत्रांच्या स्कॅन छायाप्रती अपलोड करणे, कागदपत्रांची पडताळणी आणि अर्ज भरल्याची निश्चिती करणे : ३ सप्टेंबरपर्यंत

• तात्पुरत्या गुणवत्ता याद्या प्रदर्शित करणे : ५ सप्टेंबर

• तात्पुरत्या गुणवत्ता याद्यांमध्ये तक्रारी असल्यास सादर करणे : ६ ते ७ सप्टेंबर

• अंतिम गुणवत्ता याद्या प्रदर्शित करणे : ८ सप्टेंबर