पुणे - सत्र पूर्तता संपलेल्या विद्यार्थ्यांना सावित्रीबाई फुले विद्यापीठाच्या वतीने दोन अतिरिक्त परीक्षांना बसण्याची शेवटची संधी देण्यात आली आहे. यामुळे विद्यापीठाशी संलग्न महाविद्यालयांतील ३५ हजारपेक्षा जास्त विद्यार्थ्यांना थेट फायदा होणार आहे, अशी माहिती विद्यापीठाच्या परीक्षा व मुल्यमापन मंडळाच्या वतीने देण्यात आली आहे.

सत्र पूर्तता संपलेल्या विद्यार्थ्यांना एका शैक्षणिक वर्षासाठी परीक्षेस बसण्याची परवानगी देण्याबाबतचे पत्र विद्यापीठाच्या शैक्षणिक विभागाने उपकुलसचिव मुंजाजी रासवे यांनी प्रसिद्ध केले आहे. परीक्षा मंडळाने सादर केलेल्या आणि विद्यापीठाचे कुलगुरू डॉ.सुरेश गोसावी यांनी मान्यता दिलेल्या आराखड्यानुसार पात्र असणाऱ्या सर्व विद्यार्थ्यांना अपवादात्मक स्थिती विचारात घेता, यापुढे दोन परीक्षांना बसण्याची शेवटची विशेष संधी देण्यास मान्यता देण्यात येत आहे, असे या परिपत्रकात नमूद करण्यात आले आहे.

विद्यापीठाशी संलग्न पुणे, नगर आणि नाशिक जिल्ह्यातील हजारो विद्यार्थ्यांचे शैक्षणिक वर्ष वाया जाण्याची भीती निर्माण झाली होती. परंतु, विद्यापीठ प्रशासनाने त्यावर मार्ग काढला आहे. अंतिम पूर्व व अंतिम वर्षाच्या विद्यार्थ्यांना दोन परीक्षा देण्याची संधी उपलब्ध करून देण्याचा निर्णय विद्यापीठाने घेतला आहे. २०१३-१४ पासूनच्या अंतिम पूर्व व अंतिम वर्षात अनुत्तीर्ण झालेल्या विद्यार्थ्यांना परीक्षेच्या दोन संधी मिळणार आहेत.

त्यामुळे पारंपरिक अभ्यासक्रमाच्या एस. वाय, टी वाय , च्या विद्यार्थ्यांना ही परीक्षा देता येणार आहे. व्यावसायिक अभ्यासक्रमाच्या शेवटच्या दोन वर्षाच्या विद्यार्थ्यांना ही परीक्षा देता येईल, असे विद्यापीठाच्या वरिष्ठ अधिकाऱ्यांकडून सांगितले जात आहे.

विद्यार्थ्यांचे शैक्षणिक नुकसान टाळण्यासाठी प्रशासनाने हा निर्णय घेतला आहे. अंतिम पूर्व व अंतिम वर्षाच्या विद्यार्थ्यांना याचा विशेष फायदा होईल. काही कारणांमुळे परीक्षेत अनुत्तीर्ण झालेल्या विद्यार्थ्यांनी या शेवटच्या दोन संधीचा फायदा घ्यावा.

- डॉ. महेश काकडे, संचालक, परीक्षा व मूल्यमापन मंडळ