पुणे : उच्च व तंत्रशिक्षण मंत्री उदय सामंत यांनी काही दिवसांपूर्वी पुण्यातच व्यावसायिक अभ्यासक्रमांसाठीच्या सामाईक प्रवेश परीक्षांच्या (सीईटी) संभाव्य तारखा घोषित केल्या होत्या. मात्र, अजूनही विद्यार्थ्यांना परीक्षेचे प्रवेश पत्र मिळाले नाही. याबद्दल सामंत यांना विचारले असता ते म्हणाले, ‘‘कोरोनाच्या पार्श्वभूमीवर परीक्षा केंद्रांची संख्या वाढविण्यात येत आहे. त्यामुळे थोडी उशीर लागत असून, पुढील तीन चार दिवसातच सीईटीच्या तारखा घोषित करण्यात येतील.’’

ऑल इंडिया श्री शिवाजी मेमोरिअल सोसायटीचे इन्स्टिट्यूट ऑफ इन्फर्मेशन टेक्नॉलॉजी येथे आयोजित पत्रकार परिषदेत ते बोलत होते. बारावीनंतर विविध व्यावसायिक अभ्यासक्रमांसाठी प्रवेश परीक्षा घेण्यात येते. या पदवी अभ्यासक्रमांच्या प्रवेशासाठीची ही परीक्षा कोरोनामुळे लांबली आहे. सामंत म्हणाले, ‘‘कोरोनाच्या पार्श्वभूमीवर विद्यार्थ्यांच्या सुरक्षेचा प्रश्न महत्त्वाचा आहे. म्हणून आम्ही १९३ परीक्षा केंद्रांची संख्या वाढवून ३५० करणार आहोत.’’