पुणे : विद्यापीठ अनुदान आयोगातर्फे घेतल्या जाणाऱ्या राष्ट्रीय पात्रता परीक्षेसाठी (यूजीसी नेट) ऑनलाइन नोंदणी प्रक्रिया सुरू झाली आहे. डिसेंबर २०२३ मध्ये पार पडणाऱ्या या परीक्षेसाठी अर्ज करण्याची अंतिम मुदत २८ ऑक्टोबर असणार आहे. पदव्युत्तर पदवीच्या शेवटच्या वर्षाला किंवा उत्तीर्ण झालेले इच्छुक उमेदवार ugcnet.nta.ac.in या अधिकृत संकेतस्थळाला भेट देऊन अर्ज भरू शकतात.

विद्यापीठे व महाविद्यालयांमध्ये सहायक प्राध्यापक पदाच्या पात्रतेसाठी नेट परीक्षा घेतली जाणार आहे. राष्ट्रीय परीक्षा एजंसीच्या (एनटीए) वतीने ही परीक्षा ६ ते २२ डिसेंबर याकालावधीत घेण्याचे नियोजित आहे. त्यासाठी ऑनलाइन अर्ज भरावा लागणार आहे.

एनटीएकडून त्याबाबतचे वेळापत्रक प्रसिद्ध केले आहे. अर्जामध्ये दुरुस्तीसाठी ३० व ३१ ऑक्टोबर हे दोन दिवस देण्यात आले आहेत. नोव्हेंबर महिन्याच्या शेवटच्या आठवड्यात परीक्षा केंद्राचे शहराची माहिती जाहीर केली जाईल.