Telangana Kamareddy Constituency Result : एकीकडे तेलंगणामध्ये काँग्रेसच्या विजयाची चर्चा सुरू असतानाच, भावी मुख्यमंत्री पदाचे प्रबळ दावेदार असणाऱ्या रेवंत रेड्डी यांना पराभव स्वीकारावा लागला आहे. कामारेड्डी मतदारसंघातून भाजपच्या कटिपल्ली वेंकट रमण रेड्डी यांनी त्यांचा दारुण पराभव केला आहे. विशेष म्हणजे, याच ठिकाणी तेलंगणाचे सध्याचे मुख्यमंत्री केसीआर देखील उभे होते. त्यांनाही रेड्डी यांनी धोबीपछाड दिली आहे.

वेंकटरमण रेड्डी यांना एकूण 66,652 मतं मिळाली. दुसऱ्या क्रमांकावर केसीआर यांना 59,911 मतांवर समाधान मानावं लागलं. तर 54,916 मतांसह काँग्रेसचे रेवंत रेड्डी हे तिसऱ्या क्रमांकावर राहिले. निवडणूक आयोगाच्या वेबसाईटवर याबाबतची माहिती देण्यात आली.

नॉर्थ तेलंगणामध्ये असलेल्या कामारेड्डी मतदारसंघाकडे सर्वांचंच लक्ष लागलं होतं. मुख्यमंत्री के. चंद्रशेखर राव आणि काँग्रेसचे रेवंत रेड्डी या दोघांनी कामारेड्डीमधून अर्ज दाखल केला होता. त्यामुळे याठिकाणी होणारी लढत चुरशीची ठरणार हे नक्की होतं. त्यातच भाजपच्या उमेदवारामुळे ही रंगत आणखी वाढली.

भाजपने याठिकाणी उद्योगपती असणाऱ्या कटिपल्ली वेंकट रमण रेड्डी यांना उभं करण्याचा निर्णय घेतला. वेंकट रमण रेड्डी हे पूर्वी भाजपचे कामारेड्डी विधानसभा इंचार्ज राहिले आहेत. सोबतच ते निझामाबाद जिल्हा परिषदेचे अध्यक्ष देखील होते. 12 वी पास असणाऱ्या वेंकट रमण रेड्डी यांच्याकडे सुमारे 50 कोटींची संपत्ती आहे. यासोबतच, त्यांच्यावर 11 केसेस देखील दाखल आहेत. मग अशा उमेदवाराने दोन दिग्गजांना कसं हरवलं?

कामारेड्डी विधानसभा मतदारसंघ हा पुरेसा साक्षर म्हणता येईल असा नाही. याठिकाणचा साक्षरता दर हा 49 टक्के एवढा आहे. वेंकट रमण रेड्डी यांचं हे होमग्राउंड आहे. याठिकाणी त्यांनी अधिकार पदावर नसतानाही स्वतःच्या पैशांनी रुग्णालये, शाळा आणि मंदिर उभारले आहेत. यामुळेच त्यांना स्थानिक नागरिकांचा भरपूर पाठिंबा आहे.

नागरिकांनी शोधला तिसरा पर्याय

2014 साली झालेल्या निवडणुकांमध्ये कामारेड्डी मतदारसंघातून काँग्रेसचा उमेदवार निवडून आला होता. त्यानंतर 2018 साली ही जागा बीआरएसच्या खात्यात गेली. यावर्षी लोकांनी या दोन्ही पक्षांना डच्चू देत, तिसरा पर्याय निवडण्याचा निर्णय घेतला असावा. याचाच फायदा भाजपला झाला असल्याचं तज्ज्ञांनी म्हटलं आहे.