- मधुरा बाचल

सातूचे गोड सरबत सर्रास बनवले जाते; पण ज्यांना गोड आवडत नाही किंवा मधुमेह असल्यामुळे गोड खाऊ शकत नाहीत, त्यांच्यासाठी मस्त, चटपटीत असे सातूचे तिखटसर सरबत. हे सकाळी न्याहरीसाठी दुसरे काही खाण्याऐवजी घेऊ शकता म्हणजे पोटभरीची न्याहरी होते आणि मुख्य म्हणजे पौष्टिक. अगदी लहानापासून ते मोठ्यांपर्यंत सर्वांना आवडेल असं हे सरबत बनतं.

साहित्य : २ चमचे सातूचे पीठ, १ ग्लास पाणी, हिरव्या मिरचीचा तुकडा, २ चमचे लिंबाचा रस, कोथिंबीर बारीक चिरून, १/४ चमचा काळे मीठ, १/४ चमचा जिरेपूड.

कृती :

एका ग्लासमध्ये सातूचे पीठ घ्यावे.

त्यात बारीक चिरलेली हिरवी मिरची घालावी.

त्यावर जिरेपूड, काळे मीठ घालून मिसळून घ्यावे. थोडे थोडे पाणी घालून मिसळून घ्यावे.

सर्वांत शेवटी लिंबाचा रस आणि बारीक चिरलेली कोथिंबीर घालून मिसळून घ्यावे.

हवे असल्यास बर्फाचा गोळा घालून गटागट पिऊन टाकावे.

सूचना : सगळी तयारी करायचा आळस असेल, तर ग्लासच्या बुडाला मिरचीचा तुकडा, कोथिंबीर, लिंबाची फोड घालून ठेचून घ्यावे. नंतर सातूचे पीठ आणि पाणी मिसळावे. आवडीप्रमाणे मिरपूड, आल्याचा रस घालू शकता.