खराब हवामान नेपाळमधील लोकांसाठी मोठे संकट ठरत आहे. आज म्हणजेच शुक्रवारी सकाळी मध्य नेपाळमधील मदन-आशीर महामार्गावर भूस्खलनामुळे सुमारे 63 प्रवाशांना घेऊन जाणाऱ्या दोन बस त्रिशूली नदीत वाहून गेल्याचे सांगण्यात येत आहे.

या दोन्ही बसमधील सर्व प्रवाशी बेपत्ता असल्याची माहिती समोर आली आहे. चितवनचे मुख्य जिल्हा अधिकारी इंद्रदेव यादव यांनी सांगितले की, प्राथमिक माहितीनुसार दोन्ही बसमध्ये चालकांसह एकूण 63 जण प्रवास करत होते. पहाटे साडेतीनच्या सुमारास हा अपघात झाला. आम्ही घटनास्थळी आहोत आणि शोध मोहीम सुरू आहे.

सततच्या पावसामुळे बेपत्ता बसेसचा शोध घेण्यात अडचणी येत आहेत. दरम्यान, खराब हवामानामुळे काठमांडू ते भरतपूर, चितवन येथील सर्व उड्डाणे आजसाठी रद्द करण्यात आली आहेत.

जिल्हाधिकारी म्हणाले की, स्थानिक प्रशासन आणि मदत कर्मचारी घटनास्थळी आहेत आणि शोध मोहीम सुरू आहे. संततधार पावसामुळे बेपत्ता बसेसच्या शोधात अनेक आव्हाने समोर येत आहेत.

दरम्यान, नेपाळचे पंतप्रधान पुष्प कमल दहल यांनी ट्विट केले की, "नारायणगड-मुग्लिन मार्गावरील भूस्खलनात बस वाहून गेल्याने सुमारे 63 प्रवासी बेपत्ता झाल्याच्या वृत्तामुळे मला खूप दुःख झाले आहे. मी गृह प्रशासनासह सरकारच्या सर्व यंत्रणांना प्रवाशांचा शोध आणि प्रभावी बचाव करण्याचे निर्देश दिले आहेत."