कोलंबो : श्रीलंकेत सरकारविरोधी निदर्शने सुरूच आहेत. आंदोलकांनी राष्ट्रपती गोटाबाया राजपक्षे आणि पंतप्रधान रोनिल विक्रमसिंघे यांच्या निवासस्थानांवर ताबा मिळवला आहे. देशात गोंधळ सुरू असताना राष्ट्रपती कुठे आहेत? याबाबत कोणतीही माहिती नाही. राष्ट्रपती गोटाबाया राजपक्षे (Gotabaya Rajapaksa) देशात असल्याचा दावा श्रीलंकेच्या संसदेचे अध्यक्ष महिंदा यापा अभयवर्धने यांनी सोमवारी (ता. ११) केला आहे.

दोन दिवसांपूर्वी राष्ट्रपती श्रीलंकेतून निघून गेल्याच्या बातम्या आल्या होत्या. राजीनामा जाहीर करणारे श्रीलंकेचे राष्ट्रपती पळून गेले असून, दुसऱ्या देशात असल्याचे सांगितले जात आहे. श्रीलंकेचे राष्ट्रपती गोटाबाया राजपक्षे (Gotabaya Rajapaksa) अजूनही देशातच आहे. माझ्याकडून मुलाखतीत चूक झाली. पंतप्रधान रानिल विक्रमसिंघे आणि राष्ट्राध्यक्ष दोघेही देशातच असल्याचे अभयवर्धने यांनी एएनआयला सांगितले.

श्रीलंकेला (Sri Lanka) अभूतपूर्व आर्थिक उलथापालथीचा सामना करावा लागत आहे. २२ दशलक्ष लोकसंख्या असलेला देश सात दशकांतील सर्वांत वाईट टप्प्यातून जात आहे. श्रीलंकेकडे परकीय चलनाची कमतरता आहे. ज्यामुळे देश इंधन आणि इतर आवश्यक वस्तूंच्या आयातीसाठी पैसे देऊ शकत नाही. अशा परिस्थितीत जनता रस्त्यावर उतरली आहे.

राष्ट्रपती गोटाबाया राजपक्षे १३ जुलै रोजी राजीनामा देतील, असे श्रीलंकेच्या संसदेचे अध्यक्ष महिंदा यापा अभयवर्धने यांनी शनिवारी सांगितले होते. शनिवारी सायंकाळी सर्वपक्षीय नेत्यांच्या बैठकीनंतर अभयवर्धने यांनी राजपक्षे यांच्या राजीनाम्यासाठी पत्र लिहिले होते. त्यानंतर अध्यक्ष राजपक्षे यांनी संसदेच्या अध्यक्षांना या निर्णयाची माहिती दिली. बैठकीत झालेल्या निर्णयांवर अभयवर्धने यांनी राजपक्षे यांना पत्र लिहिले.