तेल अविव  - फायझरची कोरोनावरील लस यशस्वी ठरल्यामुळे तसेच ४९ टक्के जनतेला किमान एक डोस मिळाल्यामुळे इस्राईलने लॉकडाउनचे निर्बंध शिथिल केले आहेत. किमान एक डोस मिळालेल्या नागरिकांचे एका देशातील हे प्रमाण जगात आतापर्यंत सर्वाधिक आहे.

बाधित व्यक्तींना रुग्णालयात दाखल करावे लागण्याचे प्रमाण आणि मृत्यू या बाबतीत तेथे लसीची परिणामकारकता ९५.८ टक्के इतकी आढळून आली.  ताप येण्याचे किंवा श्वसनाचा त्रास होण्याच्या बाबतीत लस ९८ टक्के परिणामकारक ठरते आहे.

रविवारपासून दुकाने, ग्रंथालये आणि संग्रहालये सुरु होऊ शकतील, मात्र सोशल डिस्टन्सिंग आणि मास्क घालणे हे नियम अनिवार्य असतील. नागरीक आता शॉपिंग मॉल आणि प्राणीसंग्रहालयासारख्या पर्यटन स्थळी जाऊ शकतील. जीम, हॉटेल, प्रार्थनास्थळेही उघडण्यात येतील. संगीत कार्यक्रम तसेच क्रीडा स्पर्धा ७० टक्के प्रेक्षक क्षमतेसह सुरु झाल्या आहेत, पण इनडोअर ठिकाणी ३००, तर खुल्या स्टेडियममध्ये ५०० जणांना प्रवेश देण्याची मर्यादा आहे.

जगभरातील इतर बातम्या वाचण्यासाठी येथे क्लिक करा

जनजीवन पुर्ववत होण्याचा हा पहिला टप्पा असल्याचे आरोग्य मंत्रालयातर्फे सलांगण्यात आले. संसर्गाने पुन्हा उसळी घेतल्यामुळे २७ डिसेंबरपासून तिसरे देशव्यापी लॉकडाउन लागू झाले होते.

दरम्यान, इस्राईलचे विमानतळ मात्र आणखी दोन आठवडे बंदच राहील. गाझा किनारपट्टीतही पहिल्या डोसचे वितरण झाले आहे. तेथे अवयव प्रत्यारोपण झालेल्यांना रशियाची स्पुटनीक व्ही लस दिली जाईल.

देशातील लसीकरण समाधानकारक पद्धतीने सुरु आहे. येत्या दोन आठवड्यांत ५० वर्षांवरील ९० टक्के इस्राईली नागरीकांचे लसीकरण पूर्ण होण्याची अपेक्षा आहे.
- बेंजामिन नेतान्याहू, इस्राईलचे पंतप्रधान

देशभरातील इतर बातम्या वाचण्यासाठी येथे क्लिक करा

ग्रीन पासपोर्ट
लसीकरण पूर्ण झालेल्या लोकांना एक प्रमाणपत्र दिले जात आहे, ज्यास ग्रीन पासपोर्ट असे संबोधण्यात आले आहे. विषाणूसंसर्गातून बरे झालेल्या तसेच सध्या लस मिळण्यास वयासारख्या निकषांवर पात्र नसलेल्या व्यक्तींनाही हे प्रमाणपत्र मिळू शकते. अॅपद्वारेच ते मिळू शकते. दुसरा डोस मिळाल्यानंतर एका आठवड्याने आरोग्य मंत्रालयाकडून ते दिले जाते, जे सहा महिन्यांसाठी वैध असेल.