काबूल : अफगाणिस्तानातील संघर्ष आता टिपेला पोहोचला आहे. गेल्या आठवडाभरात तालिबानने अफगाणिस्तानातील पाच प्रांतांच्या राजधान्या ताब्यात घेतल्या होत्या. त्यानंतर बुधवारी आणखी तीन राजधान्यांवर तालिबान्यांनी कब्जा केला आहे. अफगाणिस्तानच्या अधिकाऱ्यांनी ही माहिती दिली आहे. अमेरिकेने अफगाणिस्तानातून आपलं सैन्य मागं बोलावल्यानंतर अफगाणिस्तानच्या ३४ पैकी ९ प्रांतातील राजधान्या तालिबान्यांच्या हातात आल्या आहेत.

बाडखशन आणि बघलान हे ईशान्येतील प्रांत आणि पश्चिमेकडील फराह प्रांत तालिबान्यांनी ताब्यात घेतले आहेत. याद्वारे त्यांच्याकडून देशाच्या केंद्र सरकारवर दबाव वाढवण्याचा प्रयत्न केला जात आहे. दरम्यान, अफगाणिस्तानची राजधानी असलेल्या काबूल शहराला तालिबान्यांनी थेटपणे धमकावलेलं नसलं तरी तालिबानच्या हल्ल्यामुळे अफगाण सुरक्षा दलांचा ताण वाढला आहे आणि आता ते बऱ्याच प्रमाणात बंडखोरांविरुद्ध स्वतःहून लढत आहेत.

गेल्या पाच दिवसांत तालिबानने पाच प्रांताच्या राजधानींवर ताबा मिळवला आहे. उत्तरेत कुंडुज, सर ए पोल आणि तालोकानवर तालिबानने वर्चस्व मिळवले आहे. दक्षिणेत इराण सीमेशी लगत निमरोज प्रांताची राजधानी जरांजवर तालिबानने ताबा मिळवला. उझबेकिस्तान आणि तुर्कमेनिस्तान सीमेलगत असलेल्या नोवज्जान प्रांताची राजधानी शबरघान येथे भीषण युद्धानंतर तालिबानच्या दहशतवाद्यांनी वर्चस्व मिळवले. त्यामुळे अफगाणिस्तानच्या ८० टक्के भागांवर तालिबानने ताबा मिळवला आहे.

पारंपरिकरीत्या तालिबानचा गड असलेल्या कुडुंज शहरावर तालिबानचा झेंडा हा आतापर्यंतचा दहशतवाद्यांचा सर्वात मोठा विजय मानला जात आहे. अफगाणिस्तानला मध्य आशियाला जोडणारा रस्ता याच शहरातून गेला आहे. या मार्गावरून अमली पदार्थाची तस्करीही मोठ्या प्रमाणात होते. युरोपला याच शहरातून अमली पदार्थ जातात. त्यामुळे या शहरावर ताबा मिळवल्याने तालिबानकडे मोठा आर्थिक स्रोत आला आहे. तालिबानने यापूर्वीही २०१५ आणि २०१६ रोजी काही काळासाठी कुडुंज शहरावर ताबा मिळवला होता. आता कुडुंज शहरातून तालिबानच्या दहशतवाद्यांना हुसकावून लावणे हे अफगाणिस्तानच्या सैनिकांसमोर मोठे आव्हान असेल. दीर्घकाळापर्यंत कुडुंजवर तालिबान्यांचे वर्चस्व राहिले तर त्यांच्यासाठी नवीन स्रोत तयार होईल.