परदेशी नोकरीचा योग

मेष : सप्ताहात राशीच्या हर्षलचं फिल्ड राहील. वाहनं सांभाळा. घरात वादविवाद नकोत. बाकी सप्ताहातील बुध-शुक्राची स्थिती परदेशस्थ तरुणांचा भाग्योदय करणारी. अश्‍विनी नक्षत्राच्या व्यक्तींचं वैवाहिक जीवन समृद्धतेकडे वाटचाल करेल. नूतन वास्तुप्रवेश. ता. २ व ३ हे दिवस भरणी नक्षत्राच्या व्यक्तींना परदेशी नोकरी देणारे.

सुवार्ता मिळतील, धावपळ टाळा

वृषभ : कृत्तिका नक्षत्राच्या व्यक्तींना सप्ताह नोकरीत स्थिर करेल. रोहिणी नक्षत्राच्या व्यक्तींना सप्ताहाचा शेवट वैयक्तिक सुवार्तांच्या पार्श्‍वभूमीवर प्रसन्न ठेवेल. नोकरीत उच्चपदस्थ व्यक्तींकडून लाभ. ता. २ व ३ हे दिवस चैन, चंगळ आणि मौजमजेचे. प्रेमिकांचं छान हितगुज. मृग नक्षत्राच्या व्यक्तींनी प्रवासाच्या वेळा सांभाळाव्यात. धावपळ नको.

राजकारणी व्यक्तींकडून लाभ

मिथुन : सप्ताहातील बुध-हर्षलचा योग ओळखी, मध्यस्थीतून विवाहस्थळं आणेल. ज्योतिषी आडवा आणू नका. सप्ताहातील ता. २ ते ४ हे दिवस प्रत्येक वन डे जिंकू देतील. पुनर्वसू नक्षत्राच्या व्यक्ती प्रचंड फॉर्ममध्ये येतील. मात्र, पाकीट सांभाळा, रस्त्यावर जपा. आर्द्रा नक्षत्राच्या व्यक्तींना राजकीय व्यक्तीकडून लाभ. पुत्रोत्कर्षातून धन्यता.

नोकरीत गैरसमज होऊ देऊ नका

कर्क : सप्ताहात कायदेशीर गोष्टींकडे ध्यान द्या. नोकरीत गैरसमज टाळा. आश्‍लेषा नक्षत्राच्या व्यक्तींना सप्ताहाचा आरंभ आणि शेवट आर्थिक व्यवहारातून फसगतीचा. पुष्य नक्षत्राच्या व्यक्तींना ता. ३० व ३ हे दिवस महत्त्वाच्या गाठीभेटी यशस्वी करणारे. तरुणांना विशिष्ट स्पर्धात्मक यश.

मुलाखतींमध्ये छाप पडेल

सिंह : तरुणांना सप्ताह नोकरी देईल. मघा नक्षत्राच्या व्यक्तींची मुलाखतींतून छाप पाडेल. पूर्वा नक्षत्राच्या व्यक्तींचा कला, छंद वा विशिष्ट स्पर्धात्मक प्रकारातून मोठा भाग्योदय होईल. ता. २ व ३ हे दिवस वैभवसंपन्न करणारेच. उत्तरा नक्षत्राच्या व्यक्तींचा प्रेमविवाह संपन्न होईल.

गुरूची मेहेरनजर असेल

कन्या : तरुणांनो सप्ताहात द्वाडपणा टाळा, कुसंगत नको. बाकी सप्ताहात गुरूची मेहेरनजर राहीलच. ता. २ व ३ हे दिवस उत्तरा आणि हस्त नक्षत्राच्या व्यक्तींसाठी सुवार्तांची शृंखला ठेवतीलच. नोकरीत बढतीची चाहूल. व्यावसायिक वसुली. प्रेमिकांची छान कनेक्‍टिव्हिटी राहील.

वादग्रस्ततेचा काळ, शांत राहा

तूळ : सप्ताहातील ग्रहांचं फिल्ड हर्षलच्या ताब्यात जाईल. थोडक्यात ग्रहांचं नैसर्गिक पाठबळ नसलेला सप्ताह. घरी वा दारी कोणताही आव आणू नका, फक्त ग्रहांची गुगली गोलंदाजी खेळून काढा. मात्र, स्वाती नक्षत्राच्या व्यक्तींना ता. २ व ३ हे दिवस शुभग्रहांच्या छान कनेक्‍टिव्हिटीचे. विशाखा नक्षत्राच्या व्यक्तींना रविवार आणि शनिवार वादग्रस्त.

शुभग्रहांची साथसंगत मिळेल

वृश्‍चिक : सप्ताह शुभग्रहांची साथसंगत देईलच, मात्र सप्ताहात कोणतेही शॉर्टकट टाळा, अर्थातच संमोहनं टाळा. ज्येष्ठा नक्षत्राच्या व्यक्तींनी कायदेशीर व्यवहार सांभाळावेत, सार्वजनिक जीवनात जपावं. बाकी अनुराधा नक्षत्राच्या व्यक्तींना ता. ३० व ३१ हे दिवस अतिशय शुभलक्षणी राहतील. सहवासातील प्रिय व्यक्तींचे भाग्योदय.

विविध क्षेत्रांत चांगलं यश

धनू : राशीचं बुधभ्रमण सर्वंकष फळं देईल. शिक्षण, नोकरी आणि विवाह या त्रिघटकांतून प्युअर सिक्वेन्स लागतील. पूर्वाषाढा नक्षत्राच्या व्यक्तींना ता. २ व ३ हे दिवस मोठ्या सुवार्तांतून फ्लॅश न्यूजमध्ये आणणारे. मूळ नक्षत्राच्या व्यक्तींना राजकीय लाभ. मात्र, सप्ताहात भाजणं, कापणं यापासून जपा.

मोठ्या भाग्योदयाचा कालखंड

मकर : सप्ताहातील ग्रहांचं फिल्ड हर्षल ग्रहाच्या ताब्यात राहील, कोणताही अतिरेक टाळा. स्त्री-पुरुष संबंधातून जपायलाच हवं. दुष्टोत्तरं नकोतच. बाकी सप्ताह तरुणांना विशिष्ट स्पर्धात्मक यश देऊ शकतो. उत्तराषाढा नक्षत्राच्या व्यक्तींना ओळखीतून नोकरी. श्रवण नक्षत्राच्या व्यक्तींना ता. ३० व ३१ हे दिवस वैयक्तिक मोठ्या भाग्योदयाचे.

विशिष्ट विक्रम प्रस्थापित कराल

कुंभ : राशीचं शुक्रभ्रमण सप्ताहात रंगत आणणारं. शततारका नक्षत्राच्या व्यक्ती विशिष्ट विक्रम प्रस्थापित करतील. ता. २ व ३ हे दिवस आत्यंतिक प्रवाही राहतील. मात्र, प्रिय व्यक्तींशी गैरसमज टाळा. मंगळवारी संध्याकाळी वादविवाद टाळा. पूर्वा भाद्रपदा नक्षत्राच्या व्यक्तींना रविवार आणि शनिवार विचित्र गाठीभेटीतून बेरंग करणारे.

वास्तुविषयक व्यवहारात लाभ

मीन : सप्ताह होतकरू तरुणांना छानच. मुलाखती द्याच. व्यावसायिकांच्या जाहिरातींना सप्ताहात चांगलाच प्रतिसाद मिळेल. काहींना वास्तुविषयक व्यवहारातून लाभ. उत्तरा भाद्रपदा नक्षत्राच्या व्यक्तींना सप्ताह उत्तम शैक्षणिक संधी देणारा. ता. २ व ३ हे दिवस वैयक्तिक सुवार्तांची परंपरा ठेवतील. पूर्वा भाद्रपदा नक्षत्रास सप्ताहाचा शेवट गुप्तचिंतेचा.