शेगाव (जि. बुलडाणा) : ८ सप्टेंबर १९१० (ऋषीपंचमी तिथीला) रोजी सद्गुरू श्री गजानन महाराजांनी समाधी घेतली होती. तिथीनुसार शनिवारी (ता. ११) ऋषीपंचमीला महाराजांच्या समाधीला तब्बल १११ वर्षे पूर्ण झाली. मात्र, मागच्या वर्षीपासून कोरोनामुळे शासनाने लादलेल्या निर्बंधामुळे वर्षभरापासून श्रींचे उत्सव बंद आहेत. कोरोनाच्या संभाव्य तिसऱ्या लाटेच्या पार्श्वभूमीवर शासन नियमाचे पालन करीत भाविक भक्तांनी घरीच श्री गजानन महाराजांचे पूजन करावे, जिथे आहात तेथूनच श्रींचे दर्शन घ्यावे, कोरोनाचा प्रादुर्भाव टाळावा, गर्दी करू नये, असे आवाहन श्री गजानन महाराज संस्थानच्या वतीने करण्यात आले आहे. शासनाचे नियम व अटीचे पालन करून यावर्षीही श्रींचा ऋषीपंचमीदिनी निघणारा पालखी सोहळा निघणार नाही. समाधी सोहळा सलग दुसऱ्या वर्षी संतनगरीत भक्तांविनाच साजरा होणार आहे. तेव्हा फोटोंतून जाणून घेऊया या सोहळ्याचे महत्त्व... (छायाचित्र - संजय सोनोने)