भडगाव : भडगाव नगर परिषदेसह राज्यातील इतर नगर परिषदांचा कोरोनामुळे स्थगित झालेला मतदारयादीचा कार्यक्रम मंगळवारी राज्य निवडणूक आयोगाने जाहीर केला. त्यामुळे गुडघ्याला बाशिंग बांधून बसलेल्या उमेदवारांची प्रतीक्षा संपली आहे. १५ फेब्रुवारीला प्रारूप मतदारयादी प्रसिद्ध होणार आहे, तर १ मार्चला अंतिम मतदारयादी प्रसिद्ध होणार आहे. 

आवश्य वाचा- महावितरणकडून लूट सुरूच; छुप्या करांमुळे दुप्पट वीजबिलाचा ‘शॉक’  ​
 

राज्यातील एप्रिल २०२० ते जानेवारी २०२१ मध्ये मुदत संपणाऱ्या १३ नगर परिषदा व ८२ नगरपंचायतींचा मतदारयादीचा कार्यक्रम मंगळवारी जाहीर केला. यात जळगाव जिल्ह्यातील भडगाव व वरणगाव नगर परिषदांचा समावेश आहे. याशिवाय जिल्ह्यातील रावेर व फैजपूर नगर परिषदेच्या हद्दवाढ, तर इतर ३३ रिक्त जागांवरील पोटनिवडणुकांसाठी मतदारयाद्या प्रसिद्ध झाल्या. 

असा असेल कार्यक्रम 
प्रभागनिहाय १५ तारखेला प्रारूप याद्या प्रसिद्ध होतील. २२ फेब्रुवारीपर्यंत त्यावर हरकती व सूचना मागविण्यात येणार आहेत. १ मार्चला प्रभागनिहाय अंतिम मतदारयादी प्रसिद्ध करण्यात येईल, तर ८ मार्चला मतदान केंद्रांची यादी व मतदान केंद्रनिहाय मतदारयाद्या प्रसिद्ध केल्या जाणार आहेत. 

एप्रिलमध्ये मतदान? 
मतदारयाद्यांचा निवडणूक आयोगाने घोषित केलेला कार्यक्रम पाहता मार्चच्या अंतिम आठवड्यात किंवा एप्रिलच्या पहिल्या आठवड्यात निवडणुकीच्या तारखा घोषित होतील, असा अंदाज आहे. त्यादृष्टीने प्रशासनाच्या तयारीला वेग आला आहे. कोरोनामुळे भडगाव नगर परिषदेची तब्बल एक वर्ष निवडणूक उशिराने होत आहे. 

आवर्जून वाचा- महाविकास आघाडीतील सामंजस्य कायम राहील? 
 

उमेदवारांची प्रतीक्षा संपली 
वर्षभरापासून निवडणुकीची तयारी करत असलेल्या उमेदवाराची प्रतीक्षा संपली आहे. गेल्या वर्षी मार्चमध्ये निवडणूक आयोगाने मतदारयाद्यांचा कार्यक्रम जाहीर केला होता. मात्र, कोरोनामुळे हा कार्यक्रम स्थगित केला होता. त्यानंतर ११ महिन्यांनी मतदारयाद्यांचा कार्यक्रम जाहीर झाला आहे. वर्षभरापासून इच्छुक उमेदवारांची निवडणूक लढविण्याची प्रतीक्षा हा कार्यक्रम घोषित झाल्यामुळे संपली आहे. 

संपादन- भूषण श्रीखंडे