निंभोरा बुद्रुक (ता. रावेर) : येथील गितेश विकास ढाके (वय १८) हा शुक्रवारी दसऱ्याच्या दिवशी दुपारी चारच्या सुमारास घरातून न सांगता निघून गेला. दसरा (Dussehra) दिवस असल्यामुळे आई वडिलांना वाटले की मित्रांना भेटायला गेला असेल. परंतु सायंकाळपर्यंत घरी न आल्याने आई, वडिलांनी व परिवारातील सदस्यांनी शोधाशोध सुरू केली. यानंतर सोमवारी चौथ्या दिवशी सुकी नदीच्या पात्रात तरुणाचा मृतदेह (Death) तरंगताना आढळून आला होता.

याबाबत पोलिसांनी आई, वडिलांकडून खात्री केली असता तो मृतदेह बेपत्ता झालेला गितेश ढाकेचा असल्याची खात्री झाली. मृतदेह पाहताच कुटुंबियांनी आक्रोश केला. गितेश हा घरातील एकुलता एक मुलगा असल्याने त्याच्या जाण्याने आई, वडिलांसह कुटुंबीयांना मोठा धक्का बसला आहे.

पिकांचे नुकसान पाहून सुटला धिर

यंदाही पावसाने खरीप हंगाम पाण्यात गेला आहे. त्यामुळे पिकांचे प्रचंड नुकसान झाले आहे. हे समजून हताश झालेल्या गितेशने माझे शेतकरी वडील माझा शिक्षणाचा खर्च पेलवणार नाही, असे चित्र डोळ्यासमोर दिसत असल्याने आत्महत्या केली असावी. पिकांचे नुकसान पाहून त्याचा धीर सुटला होता. यानंतर त्याने सुकी नदीपात्रात उडी घेत आत्महत्या केली, असे समजले. याबाबत निंभोरा पोलिसात गुन्हा दाखल झाला असून, सहाय्यक पोलिस निरीक्षक स्वप्नील उनवणे यांच्या मार्गदर्शनाखाली पोलिस कर्मचारी कोल्हे, गणेश सूर्यवंशी तपास करीत आहेत.