फैजपूर (ता. यावल) : रिधुरी (ता. यावल) येथे शिवीगाळ करीत असल्याच्या संशयावरून एकाच्या डोक्यात लोखंडी रॉड मारून ठार केल्याची घटना सोमवारी (ता. १५) सायंकाळी पावणेसातच्या सुमारास घडली.

या प्रकरणी मंगळवारी (ता. १६) सहा जणांविरुद्ध खुनाचा गुन्हा दाखल करण्यात आला असून, तिघा संशयितांना अटक करण्यात आली आहे.

दरम्यान, पिळोदा येथे मुलाने वडिलांची हत्या केल्याची घटना ताजी असतानाच चोवीस तासांत तालुक्यात दुसरी खुनाची घटना घडल्याने खळबळ उडाली आहे. (One killed by iron rod on suspicion of molestation 3 suspects arrested Jalgaon Crime)

रिधुरी (ता. यावल) येथे सोमवारी (ता. १५) सायंकाळी पावणेसातच्या सुमारास धनराज वासुदेव पाटील (सोनवणे) (वय ४०) हे जनावरांच्या गोठ्यात कामानिमित्त ‘जेसीबी’ चालकाशी मोबाईल फोनवरून बोलत असताना थट्टा मस्करी करीत होते.

तेव्हा आरती सतीश सोनवणे यांना वाटले की, त्यांचे पती सतीश सोनवणे यांनाच शिवीगाळ करीत आहे. याच संशयावरून संशयित सतीश सुकदेव सोनवणे याने धनराज वासुदेव पाटील (सोनवणे) (वय ४०) यांच्या डोक्यात लोखंडी रॉड मारून त्यांना ठार केले.

तसेच मृताची पत्नी, मुले व सासरे यांना संशयित युवराज सुकदेव सोनवणे, दीपक युवराज सोनवणे यांनी लाकडी काठ्यांनी तर संशयित आरती संतोष सोनवणे, मीना युवराज सोनवणे, यमुनाबाई सुकदेव सोनवणे यांनी चापटाबुक्यांनी लाथांनी मारहाण करून त्यांना दुखापत केली.

यात वसंत झाबरू सोनवणे, सोनी धनराज सोनवणे, वैष्णवी धनराज सोनवणे, ओम धनराज सोनवणे हे जखमी झाले आहे.

याबाबत सोनी धनराज सोनवणे (रा. रिधुरी) यांनी फैजपूर पोलिसांत फिर्याद दिल्यावरून संशयित सतीश सुकदेव सोनवणे, युवराज सुकदेव सोनवणे, दीपक युवराज सोनवणे, आरती सतीश सोनवणे, मीना युवराज सोनवणे, यमुनाबाई सुकदेव सोनवणे (सर्व रा. रिधुरी, ता. यावल) यांच्याविरुद्ध खुनाचा गुन्हा दाखल करण्यात आला आहे.

संशयितांना पाच दिवसांची कोठडी

संशयित सतीश सुकदेव सोनवणे, युवराज सुकदेव सोनवणे, दीपक युवराज सोनवणे यांना पोलिसांनी ताब्यात घेतले असून, त्यांना मंगळवारी (ता. १६) न्यायालयात हजर केले असता शनिवारपर्यंत पाच दिवसांची पोलिस कोठडी देण्यात आली आहे.

सहाय्यक पोलिस निरीक्षक नीलेश वाघ तपास करीत आहेत. दरम्यान, या घटनेची माहिती मिळताच तातडीने घटनास्थळी फैजपूर पोलिस ठाण्याचे सहाय्यक पोलिस निरीक्षक नीलेश वाघ, हवालदार राजेश बऱ्हाटे, देविदास सूरदास, विकास सोनवणे, उमेश चौधरी, रवींद्र मोरे, विजय चौधरी, अरुण नमायते घटनास्थळी दाखल झाले