जळगाव : शेतातील गोठ्यातून सव्वा लाख रुपये किमतीचे १३ बोकड चोरून नेल्याची घटना पाथरी शिवारातील शेतात घडली. एमआयडीसी पोलिस ठाण्यात या प्रकरणी गुन्हा दाखल झाला.

जळगाव तालुक्यातील पाथरी येथे अभिमान नारायण धनगर (वय ६०) वास्तव्यास आहेत. त्यांचे गावालगतच शेत असून, तेथे गोठा आहे. नेहमीप्रमाणे त्यांनी आपले बोकड गोठ्यात बांधून घरचा रस्ता धरला. शुक्रवारी (ता. १७) रात्री साडेनऊनंतर गोठ्याजवळ कोणीच नसल्याची संधी साधून चोरट्यांनी एक लाख ३० हजार रुपयांचे १३ बोकड नेले. ही घटना उघडकीस येताच अभिमान धनगर यांनी एमआयडीसी पोलिसांत धाव घेत तक्रार असून, चोरट्यांविरुद्ध गुन्हा दाखल झाला आहे. सहाय्यक फौजदार राजेंद्र उगले तपास करीत आहेत.