आंबोली - डुक्कर मारण्याचे तब्बल 50  गावठी बॉम्ब रस्त्याच्या बाजूला पेरणाऱ्या कानुर येथील दोघा संशयितांना पकडण्यात आले.  पुणे येथील पर्यावरण अभ्यासक डाॅ. राजीव सिन्हा त्यांच्या जागरूकीमुळे हा प्रकार उघड झाला आहे.  त्यांनी त्या दोघांना पकडून पोलिस व वनविभागाच्या स्वाधीन केले. 

हा प्रकार काल सायंकाळी सहा वाजता घडला. मात्र आता गुन्हा दाखल करण्याची प्रकीया सुरू करण्यात आली आहे. त्या दोघा संशयितांनी आंबोली फौजदारवाडी येथील जंगल परिसरात रस्त्याच्या गटारात तब्बल 50 गावठी बॉम्ब पुरून ठेवले होते. हा प्रकार सिन्हा यांच्या लक्षात येताच त्यांनी त्यांना हटकले. परंतु आपण अडकले जाऊ या भीतीने त्या दोघा संशयितांनी पळून जाण्याचा प्रयत्न केला. मात्र त्यांना पकडून पोलिसांच्या स्वाधीन करण्यास सिन्हा यांना यश आले आहे. पोलीस व वनविभाग यांनी दोघांनी मिळून त्यांच्यावर कारवाई करावी, अशी मागणी सिन्हा यांनी केली आहे.