चिपळूण : रत्नागिरी जिल्हा मध्यवर्ती बँकेच्या सर्वपक्षीय सहकार पॅनेल विरोधात राष्ट्रवादी चिपळूण तालुकाध्यक्ष जयद्रंथ खताते यांनी बडाचे निशान उभारले आहे. रविवारी (ता. १७) पत्रकार परिषदेत सहकार पॅनेल विरोधात बंड थोपटणार असे सांगत सर्वच्या सर्व २१ जागांवर उमेदवार उभे करणार आणि सर्व सामर्थ्यानीशी ही निवडणूक लढवणार, अशी घोषणा केली. खताते यांच्या या पावित्र्यामुळे निवडणूक बिनविरोध करण्यासाठी चाललेल्या प्रयत्नांना दणका मिळाला असून आता निवडणूक होण्याची लक्षणे आहेत.

पत्रकार परिषदेत जयंद्रथ खताते म्हणाले, चिपळूण तालुक्यात राष्ट्रवादीची मोठी ताकद आहे. तरीही बँकेसाठी पॅनेलमध्ये उमेदवारी देताना तालुक्यातील कोणत्याही पदाधिकाऱ्यांना विश्वासात घेण्यात आले नाही. तालुक्यात अनेक पदाधिकारी इच्छुक असताना त्यांना विचारणा झाली नसल्याने नाराजीचा सुर मांडताना जयद्रंथ खताते म्हणाले, पक्षाचे आमदार शेखर निकम, माजी आमदार रमेश कदम, दादा साळवी आदींनाही विश्वासात घेतलेले नाही. या सर्वाना डावलून झालेल्या पॅनेलचा आम्ही निषेध करत आहोत. या पॅनेलविरोधात आम्ही बँकेच्या सर्व जागांवर निवडणूक लढवणार असून त्याची तयारी सुरू केली आहे.

राष्ट्रवादी काँग्रेसचे तालुकाध्यक्ष खताते यांनीच स्वपक्षाच्या नेत्यांवर तोफ डागत बँकेत मनमानी धोरण सुरू असून त्याविरुद्ध खदखद असल्याचे सांगितले. ज्यांना वेगवेगळी पदे दिली. त्यांनाच पुन्हा बँकेच्या संचालकपदी संधी देण्यात आली आहे. तालुक्यात अनेक महिला इच्छुक असताना त्यांना साधी विचारणा केली नाही. नवख्या लोकांना दिलेल्या संधीचे गमक कार्यकर्त्याना कळले नाही. राष्ट्रवादीचे संस्थापक अध्यक्ष शरद पवारांच्या नावाखाली पॅनेल काढायचे. त्यात आपल्याच लोकांना संचालक पदाची संधी द्यायची. शेतीपेक्षा कारखानदारांचे हित बँकेकडून जपले जात आहे, अशा धोरणा विरोधात तालुक्यातील पदाधिकाऱ्यांमध्ये खदखद असून ती सध्या व्यक्त होत आहे. यासाठी आम्ही बँकेची निवडणूक लढवणार आहोत. २१ जागासाठी उमेदवार दिले जातील. तशी तयारी करीत आहोत.

कर्ज पाच टक्क्याने, कागदांची यादी भलीमोठी

अतिवृष्टी आणि महापूरानंतर बँकेने ५ टक्के दराने कर्ज देण्याचे जाहीर केले. मात्र त्यासाठी कागदपत्रांची यादी भली मोठी असल्याने कोणाला लाभ मिळत नाही. याकडेही खताते यांनी लक्ष वेधले.

चित्रा चव्हाणही नाराज

राष्ट्रवादीच्या महिला जिल्हाध्यक्षा चित्रा चव्हाण यांनीही याविषयीची खदखद व्यक्त केली. खुल्या गटासाठी असलेली उमेदवारी आोबीसी महिलेस दिल्याने त्यांनी थेट नाराजी व्यक्त केली. या वेळी महिला शहराध्यक्षा दिपीका कोतवडेकर, माजी नगरसेविका सीमा चाळके,अविनाश हरदारे, विलास चिपळूणकर आदी उपस्थित होते.

नाराजीचे मुद्दे काय

• पदाधिकाऱ्यांना विश्वासात घेतले नाही

• खुल्यागटात आोबीसी महिलेला संधी

• आपल्याच लोकांना संचालकाची संधी

• बँक जपते कारखानदारांचे हित

• इच्छुक महिलांना विचारणाही नाही