चिपळूण (रत्नागिरी) : शहरातील काविळतळी येथील एका महिलेला कुंभार्ली येथील एका कुटुंबाने व्यवसायाचे आमिष दाखवून तिच्याकडून तब्बल ७५ तोळे सोन्याचे दागिने हडप केल्याचा धक्कादायक प्रकार समोर आला आहे. याप्रकरणी चिपळूण पोलिस ठाण्यात चार जणांविरोधात फसवणुकीचा गुन्हा दाखल केला असून त्यातील एकाला अटक केली आहे.

त्याच्याकडून १० तोळे सोने हस्तगत करण्यात आल्याची माहिती पोलिस ठाण्यातून देण्यात आली. लुबना राहिल अत्तार (रा.काविळतळी, चिपळूण) यांनी चिपळूण पोलिस ठाण्यात फिर्याद दिली आहे. रजिया कुंभार्लीकर, तरबेज कुंभार्लीकर, तन्वीर कुंभार्लीकर व अलीसाहब कुंभार्लीकर (सर्व रा. कुंभार्ली) अशी गुन्हा दाखल करण्यात आलेल्यांची नावे आहेत. लुबना अत्तार या शहरातील काविळतळी येथे राहतात. त्यांचे पती नोकरीनिमित्त परदेशात असतात.

हेही वाचा - मर्डरला एक वर्ष पूर्ण, दुसऱ्या वादळाची तयारी, पॅरोलवरील आरोपीच्या व्हिडिओ स्टेटसची चर्चा -

कुंभार्ली येथील रजिया, तरबेज, तन्वीर व अलीसाहब कुंभार्लीकर हे सर्वजण एकाच कुटुंबातील आहेत. कुंभार्ली येथे आपल्या मालकीची जमीन असून त्यावर उद्योग व्यवसाय उभा करायचा आहे. मात्र त्यासाठी आर्थिक मदतीची गरज असून ती आपण करावी, अशी मागणी या कुटुंबाने लुबना अत्तार यांच्याकडे केली होती. मात्र पैसे मिळत नसल्याने या कुंभार्लीकर कुटुंबाने लुबना हिला विविध आमिषे दाखवून तसेच गोड बोलून वेळोवेळी सोन्याचे दागिने घेतले. ही घटना २०१८ मध्ये घडली होती. दोन वर्षे झाली तरी कुंभार्लीकर कुटुंबाने लुबना यांना दागिने परत केले नाहीत. त्यांच्याकडे दागिन्यांची वारंवार मागणी करूनही चालढकल केली जात असल्याने आपली फसवणूक झाल्याचे लुबना यांच्या लक्षात आले. 

२६ सप्टेंबर २०२० रोजी लुबना अत्तार यांनी चिपळूण पोलिस ठाण्यात तक्रार दिली. त्यानुसार या प्रकरणाचा तपास पोलिस निरीक्षक देवेंद्र पोळ यांच्या मार्गदर्शनाखाली पोलिस उपनिरीक्षक श्रीकांत झगडे करीत होते. झगडे यांनी यातील संशयित आरोपी अलीसाहब कुंभार्लीकर यांना अटक करत त्याच्याकडून ७५ तोळे सोन्यापैकी १० तोळे सोने हस्तगत केले असल्याचे पोलिस निरीक्षक देवेंद्र पोळ यांनी सांगितले. उर्वरित तीन संशयितांनी अटकपूर्व जामिनासाठी न्यायालयात अर्ज दाखल केला आहे. अधिक तपास पोलीस उपनिरीक्षक झगडे करीत आहेत.

हेही वाचा - मृतदेह पाहिला आणि एकच खळबळ उडाली ; बांधकाम व्यावसायिकाची आत्महत्या -

संपादन - स्नेहल कदम