चिपळूण (रत्नागिरी) : तालुक्‍यातील राजकीयदृष्ट्या महत्त्‍वाची असलेल्या सावर्डे ग्रामपंचायत निवडणुकीत ८ जागा बिनविरोध झाल्या आहेत. १७ जागांसाठी येथे लढत होत आहे. ९ जागांसाठी १८ उमेदवार रिंगणात आहेत. सावर्डेत राष्ट्रवादी काँग्रेसचे पर्यायाने आमदार शेखर निकम यांचे वर्चस्व आहे. त्यामुळे निवडणुकीत शिवसेनेच्या पदाधिकाऱ्यांचा कस लागणार आहे.

तालुक्‍यातील खेर्डीनंतर सर्वात मोठी ग्रामपंचायत म्हणून सावर्डे ग्रामपंचायतीचा लौकिक आहे. ती बिनविरोध होण्यासाठी सुरवातीपासूनच प्रयत्न होते. पाच वर्षापूर्वी झालेल्या निवडणुकीत १७ पैकी १ जागा केवळ विरोधकांना मिळाली होती तर एका जागेवर समान मते मिळाल्यानंतर चिठ्ठीवर झालेल्या निवडीतही राष्ट्रवादीचा सदस्य विजयी झाला होता. या वेळची निवडणूक बिनविरोध करताना शिवसेनेकडून ७ जागांची मागणी केली. यात तडजोड झाली नाही. तरीही चर्चेतून ८ जागा बिनविरोध झाल्या.

हेही वाचा - आपल्याच नंदेकडून दागिने घेतले ते परत दिलेच नाहीत

आमदार निकम यांचे सहकारी जमीर मुल्लाजी हेदेखील सावर्डेत बिनविरोध झाले आहेत. सावर्डेत आमदार शेखर निकम यांच्या रूपाने राष्ट्रवादी काँग्रेसचे एकहाती वर्चस्व आहे. त्यामुळे शिवसेनेच्या पदाधिकाऱ्यांना या निवडणुकीत जिंकण्यासाठी संघर्ष करावा लागणार आहे. तालुकास्तरीय नेते अजूनही ग्रामपंचायत निवडणुकीत सहभागी झालेले नाहीत. त्यामुळे स्थानिक स्तरावरील कार्यकर्त्यांनाच लढाईस सामोरे जावे लागते आहे.

बिनविरोध निवड..

सावर्डेतील बिनविरोध निवड झालेले उमेदवार ः

सीमा गुढेकर, जान्वही पाटेकर, सायली खताते, नेहा मेस्त्री, अंकिता सावंत, समिया मोडक, जमीर मुल्लाजी, विजय बागवे.

हेही वाचा -  सायकल खरेदीला आता दोन ते तीन आठवड्यांचे वेटिंग -

मतदारांच्या गाठीभेटीवर भर

दरम्यान, ग्रामपंचायत निवडणुकीच्या प्रचारासाठी केवळ आठवड्याचा कालावधी शिल्लक आहे. त्यामुळे घरोघरी धाव घेत मतदारांच्या गाठीभेटी घेण्यात येत आहेत. परगावी असलेल्या मतदारांनाही मतदानासाठी आणण्याचे नियोजन केले जात आहे. यासाठीच्या वाहनांचे, एसटीचेही बुकिंग केले जात आहे.

संपादन - स्नेहल कदम