99320
कणकवली : येथील पंचायत समिती सभागृहात झालेल्‍या कार्यक्रमात ऋषिकेश मोरजकर यांना ‘पुरूष सन्मान’ पुरस्काराने गौरविण्यात आले.

नांदगाव येथील मोजरकरांना
‘पुरूष सन्मान’ पुरस्कार प्रदान

कणकवली, ता.२९ : महिला आर्थिक विकास महामंळातर्फे नांदगाव येथील सामाजिक कार्यकर्ते ऋषिकेश मोरजकर यांचा पुरूष सन्मान पुरस्काराने गौरव करण्यात आला. कणकवली पंचायत समिती सभागृहात हा कार्यक्रम झाला. दरम्‍यान, जिल्‍हा पातळीवरील पुरूष सन्मान पुरस्कारासाठी कणकवली तालुक्‍यातून तिघांची निवड झाली आहे. यामध्ये ऋषिकेश मोरजकर, सूर्यकांत ढवण आणि शैलेश तळेकर यांचा समावेश आहे.
‘महिला सक्षमीकरणासाठी पुरूषांचा सहभाग’ या सामाजिक भावनेतून कार्य करणाऱ्या पुरूष कार्यकर्त्यांना महिला आर्थिक विकास महामंळातर्फे ‘पुरूष सन्मान’ पुरस्कार देऊन गौरविण्यात येते. यात कणकवली तालुक्‍यातून मोरजकर यांना हा सन्मान मिळाला. पंचायत समितीच्या भालंचद्र महाराज सभागृहात हा कार्यक्रम झाला. यावेळी जिल्हा आर्थिक विकास महामंडळाचे जिल्हा समन्वयक अधिकारी नितीन काळे, कृषी अधिकारी श्री. पवार, एकात्मिक बाल विकास प्रकल्पाच्या मुख्य सेविका हळदणेकर, श्रीमती नाईक, लोकसंचालित साधन केंद्राचे अध्यक्ष उदयमती देसाई, सचिव शितल मांजरेकर आदी उपस्थित होते.
पुरूष सन्मान पुरस्कारासाठी तहसीलदार, गटविकास अधिकारी, तालुका कृषी अधिकारी, पोलिस निरीक्षक यांच्या निवड समितीने कणकवली तालुक्‍यातील २८ सामाजिक कार्यकर्त्यांची निवड केली होती. या सर्वांतून तीन नावे निश्‍चित करण्यात आली. यातील ऋषिकेश किशोर मोरजकर यांना तालुका पुरूष सन्मान पुरस्काराने गौरविण्यात आले. तर सूर्यकांत सखाराम ढवण (करुळ) आणि शैलेश कृष्णा तळेकर (कुर्ली वसाहत) यांची नावे जिल्‍हास्तरीय पुरूष सन्मान पुरस्कारासाठी निश्‍चित करण्यात आली. सीमा गावडे यांनी सूत्रसंचालन केले. भारती नारिंग्रेकर यांनी आभार मानले.