वैद्यकीय बिलांप्रकरणी
आरोग्य सेवक निलंबित
रत्नागिरी, ता. ६ ः कर्मचाऱ्यांच्या प्रलंबित वैद्यकीय बिलांचे रेकॉर्ड व्यवस्थित न ठेवल्याप्रकरणी जिल्हा परिषद आरोग्य विभागातील आरोग्य सेवकाला मुख्य कार्यकारी अधिकाऱ्यांनी निलंबित केले आहे. याला जिल्हा आरोग्य अधिकारी डॉ. अनिरुध्द आठल्ये यांनी दुजोरा दिला.
जिल्हा परिषदेच्या सर्व विभागाकडील वर्ग ३ व वर्ग ४ मधील कर्मचाऱ्यांची वैद्यकिय देयके तपासणीची जबाबदारी जिल्हा परिषद आरोग्य विभागात कार्यरत आरोग्य सेवकाकडे देण्यात आली होती. संबंधित कर्मचार्‍याने मोठ्या प्रमाणावर वैद्यकीय देयके प्रलंबित ठेवल्याची बाब तसेच वैद्यकीय देयक वॉच नोंदवही ठेवली नव्हती. संबंधित टेबलच्या आरोग्य सेवकाला कामाचा निपटारा न केल्यामुळे निलंबित करण्याचे आदेश मुख्य कार्यकारी अधिकारी कीर्तीकिरण पुजार यांनी काढले. त्या कर्मचार्‍यावरील पुढील कारवाई सीईओंच्या आदेशाने केली जाणार असल्याचे डॉ. आठल्ये यांनी सांगितले.