24862
तिराळी ः येथे सदाशिव शेटवे यांच्या अंगणात आलेला नाग.

खऱ्या नागाच्या पूजनाचा तिराळीत योग

नागपंचमीदिनीच दर्शन; शेटवे कुटुंबीयांनी केली मनोभावे पूजा

सकाळ वृत्तसेवा
दोडामार्ग, ता. २१ : नागपंचमीच्या दिवशी नागदेवतेच्या मातीच्या मूर्तीचे पूजन केले जाते. या दिवशी खऱ्याखुऱ्या नागाचे दर्शन होणे, हा योगायोग असतो; मात्र नागपंचमी दिवशी खऱ्या नागाचे पूजन करण्याचा योग तिराळी-शेटवेवाडी येथे आला. तेथील शेटवे कुटुंबीयांनी अंगणात आलेल्या नागाचे पूजन केले.
तालुक्यात आज नागपंचमीचा सण सर्वत्र साजरा करण्यात आला. घरोघरी नागदेवतेची मूर्ती आणून पूजन करण्यात आले. दूध-लाह्यांचा नैवेद्य दाखविण्यात आला. तिराळी-शेटवेवाडी येथील सदाशिव शेटवे यांच्या अंगणात मात्र दुपारी एक वाजण्याच्या सुमारास खऱ्या नागाचे दर्शन झाले. नागदेवतेचे अंगणात आगमन होताच शेटवे कुटुंब अचंबित झाले. नागाच्या जवळ जाण्यास कोणी धजावत नव्हते. यावेळी सर्पमित्र श्रीधर वेटे यांना बोलावण्यात आले. सर्पमित्र वेटे आल्यानंतर शेटवे कुटुंबीयांनी पुष्प वाहून आणि अक्षता टाकून नागाचे पूजन केले. त्याच्या समोर दुधाची वाटी देखील ठेवण्यात आली. सर्वांनी अंगणात प्रकटलेल्या नागाचे दर्शन घेतले. त्यानंतर सर्पमित्र वेटे यांनी वन विभागाला कळवून त्या नागाला पकडले व नैसर्गिक अधिवासात सोडले.