Asian Games 2023 : भारताने चीनमधील हांगझू येथे सुरू असेल्या एशियन गेम्समध्ये आज (दि. 24) भारताच्या रोईंग संघाने दमदार कामगिरी केली. भारताने दोन रौप्य पदकांसह एक कांस्य अशी 3 पदके जिंकली. अर्जुन लाल जाट आणि अरविंद सिंहने पुरूष लाईटवेट दुहेरी स्कल इवेंटमध्ये रौप्य पदक जिंकत खाते उघडले. यानंतर पुरूष पेयरमध्ये लेख राम आणि बाबू लाल यादव या जोडीने कांस्य पदक पटकावले. यानंतर पुरूष सांघिक 8 प्रकारात भारतीय संघाने रौप्य पदक पटकावले.

अर्जुन लाल जाट आणि अरविंद सिंह यांच्यासाठी पदकाची ही वाट सोपी नव्हती. अरविंद हा पाठीच्या दुखापतीमुळे चांगला सराव करू शकला नव्हता. तो जवळपास एक महिना सराव करू शकला नाही. अशा परिस्थितीत देखील अरविंदने एशियन गेम्समध्ये दमदार कामगिरी करत देशाला रौप्य पदक जिंकून दिलं. भारतीय जोडीने 6 : 48.18 सेकंदात आपली शर्यत पूर्ण केली. ते दुसऱ्या स्थानावर राहिले. तर चीनचे जुंजी फान आणि मान सून यांनी 6 : 28.18 सेकंद वेळात शर्यत पूर्ण करत सुवर्ण पदक जिंकले.

अरविंदने पदक जिंकल्यावर सांगितले की, 'आमचे स्वप्न सुवर्ण पदक जिंकण्याचे होते. मात्र दोन महिन्यापूर्वी माझ्या कंबरेला दुखापत झाली. त्यामुळे पुरेसं ट्रेनिंग करू शकलो नाही. आता पुढचे लक्ष्य हे पॅरिस ऑलिम्पिकमध्ये पदक पटकावण्याचं आहे.'

तो पुढे म्हणाला की, 'माझ्या कंबरेच्या दुखापतीमुळे आम्हाला 20 ते 25 दिवस सराव करता आला नाही. आता आम्ही पॅरिस ऑलिम्पिकवर जास्त लक्ष केंद्रीत करणार आहोत. याचबरोबर 2026 च्या एशियन गेम्समध्ये सुवर्ण पदक जिंकण्याचा प्रयत्न करणार आहोत.'

(Sports Latest News)