नवी मुंबई : भारतीय महिला क्रिकेट संघावर एकदिवसीयनंतर टी-२० मालिका गमावण्याची आपत्तीही ओढवली. ऑस्ट्रेलियन संघाने येथे झालेल्या अखेरच्या लढतीत यजमान भारतीय संघावर ७ विकेट व ८ चेंडू राखून विजय मिळवला आणि तीन सामन्यांची टी-२० मालिका २-१ अशी जिंकली. याआधी ऑस्ट्रेलियन संघाने एकदिवसीय मालिकेत ३-० असे यश मिळवले होते.

भारताकडून ऑस्ट्रेलियासमोर १४८ धावांचे आव्हान ठेवण्यात आले होते; पण कर्णधार एलिसा हिला व बेथ मुनी या सलामी जोडीने भारताच्या आशांवर पाणी फेरले. दोघींनी पहिल्या विकेटसाठी ८५ धावांची भागीदारी करताना भारतीय गोलंदाजांचे आव्हान लीलया परतवून लावले. हिलीने ३८ चेंडूंत ९ चौकार व १ षटकारासह ५५ धावांची खेळी केली. मुनी हिने ४५ चेंडूंमध्ये ५ चौकारांसह नाबाद ५२ धावांची खेळी करताना ऑस्ट्रेलियाच्या विजयावर शिक्कामोर्तब केला.

दरम्यान, याआधी स्मृती मानधना व शेफाली वर्मा या जोडीने ३९ धावांची भागीदारी केली. मेगन शूटच्या गोलंदाजीवर शेफाली २६ धावांवर बाद झाली. त्यानंतर ६० ते ६६ या धावसंख्येदरम्यान भारताने तीन महत्त्वाचे फलंदाज गमावले आणि तिथेच धावसंख्येला ब्रेक लागला. ॲनाबेल सदरलँडने जेमिमाला २ धावांवर, जॉर्जिया वेअरहॅमने स्मृतीला २९ धावांवर आणि पुन्हा सदरलँडने हरमनप्रीत कौरला ३ धावांवर बाद करीत भारताला बॅकफूटवर नेले.

भारतीय संघ ४ बाद ६६ धावा अशा संकटात सापडला असताना रिचा घोष हिने तळाच्या फलंदाजांना सोबत घेऊन भारताला सावरले. रिचा घोष हिने २८ चेंडूंमध्ये २ चौकार व ३ षटकारांसह ३४ धावांची खेळी साकारली.

संक्षिप्त धावफलक ः भारत २० षटकांत ६ बाद १४७ धावा (स्मृती मानधना २९, रिचा घोष ३४, ॲनाबेल सदरलँड २/१२) पराभूत वि. ऑस्ट्रेलिया १८.४ षटकांत ३ बाद १४९ धावा (एलिसा हिली ५५, बेथ मुनी नाबाद ५२).