जागतिक कसोटी अंतिम सामन्यात ऑस्ट्रेलियाविरुद्ध दारुण पराभव झाल्यानंतर बीसीसीआय आता ‘अॅक्शन मोड’वर आले आहे. देशभरातून २० नवोदित अष्टपैलू खेळाडूंची निवड केली आहे आणि त्यांना तीन आठवड्यांच्या सराव शिबिरासाठी बंगळूर येथील राष्ट्रीय क्रिकेट अकादमीत पाचारण करण्यात आले आहे. या २० खेळाडूंत अर्जुन तेंडुलकरचाही समावेश आहे.

या वर्षअखेरीस इमर्जिंग आशिया करंडक (२३ वर्षांखालील) ही स्पर्धा होणार आहे. त्यासाठी बीसीसीआयने नवोदित खेळाडूंचाही शोध सुरू केला आहे. त्यासाठी या २० खेळाडूंमधील काही अव्वल खेळाडूंचा उपयोग होऊ शकेल. क्रिकेट अकादमीचे प्रमुख व्ही. व्ही. एस. लक्ष्मण तिन्ही फॉरमॅटसाठी गुणवत्ता शोधण्यासाठी प्राधान्य देत आहेत, अशी माहिती बीसीसीआयच्या वरिष्ठ पदाधिकाऱ्याने दिली. हे २० खेळाडू निवडण्यासाठी निवड समितीचे अध्यक्ष एस. एस. दास यांनीही मदत केल्याचे सांगण्यात आले.

आता केवळ अष्टपैलू गुणवत्ता असलेले खेळाडू आम्ही शिबिरासाठी निवडले आहेत. यातील काही प्रामुख्याने फलंदाज-गोलंदाज आहेत, तर काही जण गोलंदाज अष्टपैलू आहेत. त्यांच्याकडे असलेल्या गुणवत्तेत अजून प्रगती करण्यासाठी हा प्रयत्न आहे, असेही बीसीसीआयच्या या सूत्रांचे म्हणणे आहे.

या २० खेळाडूंत सौराष्ट्राचा डावखुरा वेगवान गोलंदाज आणि आक्रमक फटकेबाज चेतन साकारिया याचा समावेश आहे. २०२१ मध्ये तो खेळलेला आहे, तसेच आयपीएलमध्ये तो दिल्ली संघात होता. पंजाबचा अभिषेक शर्मा, गोव्याचा मोहित रेडकर, राजस्थानचा मानव सुतार, दिल्लीतील हर्षित राणा आणि दिविज मेहरा यांनाही संधी देण्यात आली आहे.