Afghanistan vs Pakistan : पाकिस्तान विरुद्धच्या सामन्यात अफगाणिस्तानचा फिरकीपटू राशिद खानने अनोख्या विक्रमाला गवसणी घातली. मोहम्मद हाफिजच्या रुपात त्याने टी-20 मध्ये शंभरावा बळी मिळवला. गुलबदिनने त्याचा झेल टिपला. मोहम्मद हाफिजचा झेल टिपल्यानंतर गुलबदिनने बॉडी-बिल्डरच्या तोऱ्यात सेलिब्रेशन साजरे केल्याचे पाहायला मिळाले. राशिद खानने पाकिस्तान विरुद्धच्या सामन्यात दोन विकेट्स घेतल्या या पाकिस्तानी कर्णधार बाबर आझमच्या विकेट्सचाही समावेश होता. बाबरला त्याने बोल्ड केलं.

पाकिस्तानच्या संघाला रोखण्यासाठी अफगाणिस्तानचा कर्णधार मोहम्मद नबीने गोलंदाजीचा भन्नाट फॉर्म्युला तयार केला होता. राशिदची षटके त्याने शिल्लक ठेलवली. 11 व्या षटकात नबीने राशिदच्या हाती चेंडू दिला. आपल्या पहिल्याच षटकात त्याने बाबरला चकवा दिला. अंपायरने राशिदच्या पायचितची अपील मान्यही केली होती .पण बाबरचा रिव्ह्यू यशस्वी ठरला. त्यानंतर राशिदने मोहम्मज हाफिज आणि बाबरची विकेट घेतली. आपल्या 4 षटकांच्या कोट्यात त्याने 26 धावा खर्च केल्या.

नबीचा प्लॅन यशस्वी ठरतोय असे चित्र काही वेळ निर्माण झाले होते. बाबरची विकेट पडल्यानंतर नवीन उल हकने शोएब मलिकला माघारी धाडत पाकिस्तान संघाला अडचणीत आणले होते. पण करीम जनतच्या षटकात डाव फिरला. असिफ अलीने या षटकात 4 षटकार खेचले. अफगाणिस्तानने स्पर्धेत दुसरा विजय नोंदवण्याची संधी निर्माण केली होती. याला फिनिशिंग टच देण्यात ते अपयशी ठरले. या पराभवानंतरही अफगाणिस्तानचा संघ सुपर 12 मधील दुसऱ्या गटात पाकिस्तान पाठोपाठ दुसऱ्या स्थानावर आहे.