T20 World Cup 2024 Viral Video: टी20 वर्ल्ड कप 2024 स्पर्धा सध्या अमेरिका आणि वेस्ट इंडिज येथे सुरू आहे. या स्पर्धेत अनेक रोमांचक सामने आत्तापर्यंत पाहायला मिळाले आहेत. इतकेच नाही, तर अनेक धक्कादायक निकालही आत्तापर्यंत या स्पर्धेत पाहायला मिळाले आहेत.

याच दरम्यान स्पर्धेदरम्यानचे बरेच बिहाइंड द सीन व्हिडिओ व्हायरल झालेलेही दिसले. असाच एक व्हिडिओ सध्या सोशल मीडियावर जोरदार व्हायरल होत आहे.

या व्हिडिओमध्ये सुनील गावसकर आणि वसीम अक्रम डान्स करताना दिसत आहे. गावसकर आणि अक्रम टी20 वर्ल्ड कप 2024 स्पर्धेत समालोचक म्हणून काम करत आहेत.

व्हायरल होत असलेला व्हिडिओ टी२० वर्ल्ड कप २०२४ स्पर्धेदरम्यानचा आहे. मात्र, हा व्हिडिओ कोणत्या सामन्यादरम्यानचा आणि कोणत्या मैदानातील आहे, हे स्पष्ट होत नाहीये. मात्र, हा व्हिडिओ न्युयॉर्कमधील नसाऊ काउंटी क्रिकेट मैदानातील असल्याची शक्यता आहे.

कारण भारतीय संघातील खेळाडू आजूबाजूला दिसत आहेत. म्हणजेच भारताच्या एखाद्या सामन्यादरम्यानचा हा व्हिडिओ आहे. भारताने या वर्ल्ड कपमधील पहिले तीन सामने न्युयॉर्कमध्ये खेळले आहेत.

या व्हिडिओमध्ये दिसते की मैदानात डिजेवर गाणे वाजत आहे. त्यावर गावसकर यांच्यासह वसीम अक्रमनेही ठेका धरला होता. ते दोघेही नाचण्याचा आनंद घेत असताना स्टेडियममधील प्रेक्षकाने हे दृश्य टीपले असून आता त्यांचा व्हिडिओ व्हायरल होत आहे.

दरम्यान, या टी20 वर्ल्ड कपमध्ये भारतीय संघाने अ गटातून अव्वल क्रमांक मिळवत सुपर-8 फेरीत स्थान पक्के केले आहे. मात्र पाकिस्तानचे आव्हान संपुष्टात आले आहे. अ गटातून अमेरिका संघाने दुसरा क्रमांक मिळवत सुपर-8 मधील स्थान पक्के केले आहे.

पाकिस्तानला या स्पर्धेत फारशी चांगली कामगिरी करता आलेली नाही. याबद्दल अक्रमने संघावर तिखट शब्दात टीकाही केली होती. त्याने म्हटले होते की आता नवा पाकिस्तान संघ उभारण्याची गरज आहे.