ICC T20 Batting Ranking Phil Salt : आयसीसीने टी 20 बॅटिंग रँकिंगची नुकतीच घोषणा केली. इंग्लंडचा धडाकेबाज फलंदाज फिल सॉल्टने ताज्या रँकिंगमध्ये मोठी उसळी घेतली असून तो थेट दुसऱ्या स्थानावर पोहचला आहे. त्याने कारकिर्दीतील सर्वात चांगले 802 रेटिंग गुण मिळवले आहेत.

सॉल्टने वेस्ट इंडीज विरूद्ध इंग्लंड टी 20 मालिकेत सर्वाधिक धावा केल्या आहेत. त्याचा फायदा त्याला आयसीसी टी 20 रँकिंगमध्ये झाला आहे. इंग्लंडच्या सलामीवीराने त्रिनिदाद येथे झालेल्या दोन सामन्यात 119 आणि 38 धावा केल्या. त्यामुळे त्याने 18 स्थानांची उसळी घेतली. रँकिंगमध्ये पाकिस्तानचा सलामीवीर मोहम्मद रिझवान हा 787 रेटिंगसह तिसघ्या स्थानावर आहे.

जरी सॉल्टने 18 स्थानांची उसळी घेतली असली तरी त्याला सूर्यकुमार यादवच्या अव्वल स्थानाला धक्का पोहचवता आलेला नाही. सूर्यकुमार यादव आयसीसी टी 20 रँकिंगमध्ये अव्वल स्थानी कायम आहे. त्याचे 887 रेटिंग पॉईंट्स झाले आहेत.

इंग्लंडचा मधल्या फळीतील फलंदाज लिम लिव्हिंगस्टोन याने देखील आयसीसी टी 20 रँकिंगमध्ये मोठी उसळी घेतली. तो तब्बल 27 स्थानांची उडी घेत 38 व्या स्थानावर पोहचला आहे. त्याने वेस्ट इंडीजविरूद्धच्या दोन सामन्यात नाबाद 54 आणि 28 धावांची खेळी केली. अष्टपैलू असलेल्या लिव्हिंगस्टोनने अष्टपैलू श्रेणीत देखील आपलं रँकिंग सुधारलं आहे. त्याने चार स्थानांनची सुधारणा करत 175 रेटिंग पाईंट्सह आठव्या स्थानावर पोहचला आहे.