India vs Australia Jasprit Bumrah ruled out of Indore ODI : भारतीय संघाचा अनुभवी वेगवान गोलंदाज जसप्रीत बुमराह ऑस्ट्रेलियाविरुद्धच्या दुसऱ्या एकदिवसीय सामन्यातून बाहेर पडला आहे. जसप्रीत बुमराहला कोणत्याही प्रकारची दुखापत झाली नाही, तो त्याच्या कुटुंबीयांना भेटायला गेला आहे. त्यामुळेच इंदूर वनडे सामन्यादरम्यान तो ड्रेसिंग रूममध्येही दिसणार नाही. त्याच्या जागी मुकेश कुमारचा संघात समावेश करण्यात आला आहे.

जसप्रीत बुमराह दुखापतीमुळे बराच काळ मैदानापासून लांब होता. संघात परतण्यापूर्वी तो गेल्या वर्षी ऑस्ट्रेलियाविरुद्ध शेवटचा सामना खेळला होता आणि त्यानंतर तो बाहेर पडला होता. वर्ल्डकपपूर्वी बुमराह तंदुरुस्त होईल अशी सर्वांनाच अपेक्षा होती आणि असेच काहीसे घडले. त्याचे पुनरागमन आयर्लंड दौऱ्यावर झाले आणि त्यानंतर तो आशिया कपमध्येही खेळला आणि जबरदस्त गोलंदाजी केली.

जसप्रीत बुमराहने ऑस्ट्रेलियाविरुद्ध पहिला एकदिवसीय सामना खेळला होता. त्या सामन्यात मोहम्मद सिराजला विश्रांती देण्यात आली होती, परंतु आता बुमराह दुसऱ्या वनडेत खेळणार नाही आणि त्याच्या जागी मोहम्मद सिराजचा प्लेईंग इलेव्हनमध्ये समावेश केला जाऊ शकतो.

बीसीसीआयने एक पोस्ट जारी करून म्हटले आहे की, जसप्रीत बुमराह दुसऱ्या वनडेसाठी भारतीय संघासोबत इंदूरला गेला नाही. तो त्याच्या कुटुंबीयांना भेटण्यासाठी गेला असून त्याला एक छोटीशी विश्रांती देण्यात आली आहे. दुसऱ्या वनडेसाठी बुमराहच्या जागी वेगवान गोलंदाज मुकेश कुमार संघात सामील झाला आहे.

जसप्रीत बुमराहने जेव्हापासून पुनरागमन केले आहे, तेव्हापासून भारतीय गोलंदाजी विभाग आक्रमक दिसत आहे.