नवी दिल्ली : भारत-इंग्लंड कसोटी मालिकेच्या उत्तरार्धात सर्वात चर्चेत राहिलेले आणि कोरोना बाधित झालेले मुख्य मार्गदर्शक रवी शास्त्री, गोलंदाजी आणि क्षेत्ररक्षण प्रशिक्षक भारत अरुण आणि श्रीधर या संसर्गातून मुक्त होण्याच्या मार्गावर आहेत, परंतु भारतात परतण्यासाठी त्यांना `फिट टू फ्लाय` म्हणजेच प्रवास करण्यासाठी आवश्यक असलेली तंदुरुस्ती चाचणी द्यावी लागणार आहे.

ब्रिटनच्या आरोग्य नियमाप्रमाणे या तिघांचे १० दिवसांचे अलगीकरण पूर्ण झाले आहे, पण मायदेशी परतण्यासाठी त्यांना आरटी-पीसीआर चाचणी निगेटिव्ह येण्याबरोबर फिट टू फ्लाय चाचणीही पार करावी लागणार आहे. शास्त्री, अरुण आणि श्रीधर यांची प्रकृती उत्तम आहे. कोरोनातून ते मुक्त झाले आहेत, त्यामुळे अलगीकरणातून बाहेर आले आहेत, परंतु ब्रिटनच्या आरोग्य संदर्भातील नियमानुसार त्यांचे सीटी स्कोअर ३८ पेक्षा अधिक असायला हवा तरच त्यांना विमानातून प्रवास करण्याचे प्रमाणपत्र मिळू शकेल. हा सीटी स्कोअर व्यवस्थित आला तर पुढच्या दोन दिवसांत ते मायदेशी रवाना होऊ शकतील, असे बीसीसीआयच्या अधिकाऱ्याने सांगितले.

या सिटी (सीटी स्कॅन) स्कोअरवरून कोरोना विषाणूने एखाद्या व्यक्तीच्या प्रकृतीवर किती परिणाम केला याचे निदान होते. चांगला सिटी स्कोअर असेल तर प्रवास करताना अडचणी येणार नाहीत. लंडन ते दिल्ली किंवा मुंबई हा विमान प्रवास मोठा आहे, त्यामुळे सिटी स्कोअर ४० पर्यंत असणे आवश्यक आहे, असे सांगण्यात येत आहे. शास्त्री आणि इतर दोघांना आता कोणतीही लक्षणे नाहीत, परंतु तंदुरुस्ती प्रमाणपत्र गरजेचे ठरणार आहे.