IPL 2021 MI vs DC: शारजाच्या मैदानात दिल्ली कॅपिटल्सने मुंबई इंडियन्सवर मात केली. पहिल्यांदा फलंदाजी करताना मुंबई इंडियन्सने निर्धारित 20 षटकात 8 बाद 129 धावा करत दिल्ली कॅपिटल्ससमोर 130 धावांचे लक्ष्य ठेवले होते. आघाडीची फलंदाजी कोलमडल्यानंतर श्रेयस अय्यरने मैदानात तग धरला. त्याला अश्विनने उत्तम साथ दिली. या दोघांच्या महत्त्वपूर्ण भागीदारीच्या जोरावर दिल्ली कॅपिटल्सने 4 गडी आणि 5 चेंडू राखत सामना खिशात घातला. या पराभवानंतर रोहित शर्मा काय म्हणाला वाचा...

रोहित शर्मा काय म्हणाला...

"या मैदानावर धावा करणं काहीसं कठीण आहे हे आम्हाला माहिती होतं. आम्ही या मैदानावर झालेल्या अनेक सामन्यांचा अभ्यास केला होता. या मैदानावर सहजासहजी धावा करता येत नाहीत याची आम्हाला कल्पना होती. आम्ही सामन्याची योग्य पद्धतीने तयारी केली होती. आम्हाला काय करायचं होतं ते आम्हाला माहिती होतं. १७०-१८० धावा या मैदानावर होणार नाहीत हेही आम्हाला माहिती होतं. त्यामुळे १४० धावांचं गणित आमच्या डोक्यात होतं. पण काही ठिकाणी आमची गणितं फसली आणि आम्हाला पराभूत व्हावं लागलं", अशी प्रामाणिक कबुली रोहित शर्माने दिली.

"आम्ही फलंदाजीची सुरुवात वाईट केली. आमच्या फलंदाजांना भागीदारी करता आल्या नाहीत. तुमच्या फलंदाजांना चांगली फलंदाजी करता आली नसेल आणि तुम्ही अपेक्षित धावांचे आव्हान समोरच्या संघाला दिलेले नसेल तर तसे सामने जिंकणं खूप कठीण असतं. आमच्या फलंदाजांची चूक झाली आणि मी ती चूक मान्य करतो. आमच्या मधल्या फळीतील खेळाडूंनी डाव सावरायला हवा होता, पण त्यांना ते शक्य झालं नाही. आम्ही आमच्या क्षमतेनुसार खेळलो नाही. आमच्या लौकिकाला साजेसा खेळ आम्हाला करता आला नाही याचं दु:ख आहे. मी अशी आशा करतो की उर्वरित दोन सामन्यांमध्ये आम्ही लौकिकाला साजेसा खेळ करून दाखवू", असा विश्वास मुंबईच्या हिटमॅनने व्यक्त केला.