पुण्यातील मैदानात रंगलेल्या सामन्यात राजस्थान रॉयल्सचा (Rajasthan Royals) सलामीवीर आणि इंग्लंडचा स्फोटक फलंदाज जोस बटरलनं (Jos Buttler) खास विक्रमाला गवसणी घातली. सनरायझर्स हैदराबाद (Sunrisers Hyderabad) विरुद्धच्या सामन्यात त्याने संघाला दमदार सुरुवात करुन दिली. जयस्वालच्या साथीनं त्याने पहिल्या विकेटसाठी अर्धशथकी भागीदारी करुन प्रतिस्पर्धी संघातील गोलंदाजांचे खांदे पाडले. त्याने 3 चौकार आणि 3 षटकाराच्या मदतीने बटलरने 28 चेंडूत 35 धावांची खेळी केली. त्याची ही खेळी छोटीखानी असली तरी खास विक्रमाला गवसणी घालणारी ठरली.

आयपीएलमध्ये त्याने 2000 धावांचा टप्पा पार केला आहे. अशी कामगिरी करणारा इंग्लंडचा तो पहिला खेळाडूही ठरलाय. आतापर्यंत अन्य कोणत्याही इंग्लिश प्लेयरला अशी मजल मारता आलेली नाही. 66 सामन्यातील 65 डावात त्याने 35.75 च्या सरासरीनं आणि 149.62 च्या स्ट्राइक रेटनं 2003 धावा केल्या आहेत. राजस्थान रॉयल्सकडून खेळणारा बटलर मुंबई इंडियन्सकडूनही खेळला आहे.